Inhliam Messi tan season bul tanna kawng a kaw dawn em?

Inhliam Messi tan season bul tanna kawng a kaw dawn em?
Tun thla February ni 7 khan pre-season friendly match-ah Lionel Messi chuan a kaihza vei lam tha a tina a, Ecuadorian club Barcelona Sporting Club nen 2-2-a an inhnehtawk tuma a hliam kha rin aiin a bawksawp reipui ta a, season tharah hian Inter Miami tan bul a tan thei dawn em a chiang ta lo!
Inter Miami hian MLS season thar campaign chu February ni 21 hian an tan tawh mai dawn a, hetih lai hian tum hnih lai reigning league MVP ni tawh an thiampuipa ber a la thokang hlei thei lo a, medical test an tih that leh hnuah a kaihza ha na hi an nemnghet ta a ni.
Puerto Rico rama season thar inbuatsaihna tournament kharna inkhel pawh chu vawiin, Zirtawpni hi ni mah se mipuiin inkhel en tura ticket awm zawng zawng an lei chhan ber Inter captain Messi ber a inkhelh theih dawn loh avangin February ni 26-ah an sawn phah lawng lawng!
Argentine great hi Nilaini thleng khan training ground-ah tak ngial pawh hmuh tur a la awm lo a, chu tia an nghahhlelh ber inkhel thei dawn loa a lan tak hnu chuan ticket leitute an hlim lo a, an hmuh chak ber inkhel lai hmuh duhin tualchhung sawrkar leh Ecuadotrian club Independiente del Valle-te pawhin Inter Milam an dawr hial a, Independiente del Valle leh MLS club-in final pui an khelh tur chu sawn an lo remti ta a ni.
Ecuador rama Barcelona SC nen an in draw tum khan Argentina captain hian goal khat thawh mah se second half tir lamah hliam avangin lakchhuah a ni a, training pawh a la zawm thei ta lo a ni.
Juan Ramon Loubriel Stadium, Puerto Rico-a pre-season finale-ah Inter Miami captain Messi a inlan dawn avang khan ticket an zawrh chhuah atanga minute 17 lek chhungin fans lamin an inchuh zo nghal duak a, phung zinga piring vawrh chu nep te!