Inhmun tifel turin PAMRA-in ZPM sawrkarah beiseina nei

PAMRA chuan remna avanga an rawn let hnua an inbenbelna tura sawrkarin ram a pekah kum 38 ral hnu ah pawh house site tihfel sak an la ni lo tih sawiin, ZPM sawrkarah beiseina sang tak an nei tih an sawi.
Peace Accord MNF Returnees’ Association (PAMRA) hian Zirtawpni khan ‘Remna Run Lawi Ni’ champha vawi 38-na an hmang a. Remna avanga haw hnam sipai 572 zinga chatuan ram panta mi 227 sunna an hmang.
1986 June 30-a ziah inremna thuthlung (Peace Accord) chu Zofaten an ngaihlut em avangin an ngaihlu hle a; chutihlaiin hnam sipaite erawh luchhum banchhum huama ram leh hnam tana an inpekna, an thian nunna pete leh hliam tuar, ramtui leiloa awm te avangin he Peace Accord hian a keng zo ve lo tih PAMRA chuan a sawi.
‘Remna thuthlung ziah a nih takah khan, loh theih lohin rammute chu Bangladesh Chittagong Hill Tracts atangin ngaihtuahna chingchivet tak chungin Mizoram kan rawn pan a. 1986 August 2-ah Aizawl kan rawn thleng khawm a, Luangmuala Berampu tlang, Remna Runah kan lawilut ta a ni,’ an thuchhuah chuan a ti.
Remna Run Lawi Ni hi an ngaihpawimawh em avangin Luangmuala Remna Run tlangah a hriatrenga lung an phun chhan chu – Martar Thlanmual hmun a nih avang leh Remna Run awmna a nih vang a ni, tiin, thangtharten zalenna sualtu, a tawp thlenga thawk Mizo hnam sipaite an la rawn zirchiang zel dawn a, he monument hi chutiang atan chuan thil tangkai a la ni zel dawn tih an sawi.
‘Kum 38 liam hnu ah pawh Mizoram sawrkarin kan inbenbelna tur in hmun ala tifel lo hi a tuartu tan chuan a rei ngat ngat ta hle a. In hmun ber a fel loh avangin sawrkar laipui atanga in sakna lokal pawh khaw lo takin a kalral ta mai mai a. Hnam sipai, remna avanga kirte tan sawrkarin in hmun a pek, Chaltlang ram Maumual khu house site tihfel a nih hma chuan hma kan la thei loa, sawrkarna chang apiangah kan thlen chamchi a, tuna ZPM sawrkarah hian beiseina kan nei a ni,’ PAMRA hian an ti.