Inhnek turin Dinsanga leh Wild an inpeih ta!

Inhnek turin Dinsanga leh Wild an inpeih ta!
A vawikhatna’n Leitlangpuiah professional boxing buatsaih a ni dawn a, Laldinsanga’n a pianna leh seilenna khuaa pro boxing a khelh hmasakber turah Filipino boxer Bryan James Wild a hmachhawn dawn.
HPC Lunglei Fight Night hi K. Liantluanga Indoor, Pukpuiah zan hnih chhung khelh a ni dawn a; inhnek vawi 10 zinga paruk hi professional tur a ni.
Mizo boxer 14 an inlan dawn a; Thawhtanni khan an inhnekna tur khua Lungleiah an inbun fel tawh a; Thawhlehni zan khan Wild leh India boxer pathumin Leitlangpui an thleng ve thung a, inbuatsaihna peih fel a ni tawh.
Supervisor turin Indian Boxing Council atangin Ajay Salvi a lo kal a, professional boxing chhinchhiahna boxrec-ah a ziaklut ang.
Dinsanga thawhpui Grassroot Boxing Promotions hotupa Mustafa Kamal pawhin Lunglei a pan fel tawh bawk.
April 25, Zirtawpni zan
Professional ni lo pahnih nen inhnek vawinga a awm dawn a; a pui berah tun dinhmuna Mizo boxer tha ber ang hiala ngaih hmachhawn turin India-ah a vawikhatna’n kum 23 mi Wild a inhnek dawn a, bantamweight huangah round 8 innuai turin Ramthar Veng Lunglei tlangval Dinsanga nen an innuai ang.
Wild hian ‘India rama inhnek turin a inpeih’ tih a sawi a; pro boxing vawi 15 khel tawhin tum 12 a chak a, vawihnih tlawmin, mi pakhat a inhnehtawkpui a ni.
WBC Youth bantamweight world champion Dinsanga’n 2022 LPS Pro Fight atangin professional a luhchilh ve thung a, vawi 10 a inhnek tawhah chak vekin, world title pangngai chuh a tumna kawngah rahbi a tuk mek a, May ni 1 khian Dubai-ah Guiming Li nena inhnek zui leh nghal turin a promoter-te nen ruahmanna an siam.
Vawithum a zawna LPS Pro Fight champion ni lai Dinsanga chuan, “Mizorama professional boxing hmuhnawm ber siam ka tum a, ka bitum tur pawh a thain ka hria. Mizoram mipui leh Lunglei mipui tan theihtawp chhuah ka tum a, in zavaia min lo tawiawm theuh turin ka sawm a che u,” a ti.
February ni 25 kha a inhnek hnuhnun ber niin, Bangkok-ah awlsam takin Sarawut Jiamthong a hneh a, a dinhmun pawh kang hman viau mah se thla hnih a inhnek loh chhungin a ranking a hniam hret hret a, khawvel puma professional boxing chhinchhiahna boxrec bantanweight rating-ah 75-na luahin, WBC bikah 38-na a ni bawk.
Zan hnuhnung zawkah hian featherweight-ah round ruk turin Omega Lalramdina leh Vinod Vanteddu an inhnek dawn a; lightweight-ah round li turin Cherhlun fighter C. Lalhruaitluanga’n Remruata a hmachhawn bawk ang.
2024 LPS Pro Fight-ah Omega a chetha chho hle a, bantamweight title fight-ah erawh Dinsanga a hneh zo lo. Chutih rualin August ni 23, 2023 kha pro boxing a khelh hnuhnun ber a ni a, tum hnih a inlan tawhah chak ve vein, a inhnekpui tur Vanteddu erawh pro boxing vawiriat khel tawhin, tum nga a chak a, vawihnih tlawmin tum khat a inhnehtawk a, Omega tan fiahna a tling ang.
Professional ni lo inhnek pahnih a awm tel dawn a, lightweight-ah Lalnunthara leh Sebastian, welterweight-ah John Lalhunlawma leh Erik Lalthangkima an inhmachhawn ang.
April 24, Ningani zan
Electric Veng Lunglei tlangval F. Lalthanliana Junior a inlan ve thung dawn a, middleweight-ah Yuvraj Singh nen round ruk tura ruahman a ni.
Ruihhloin a tihbuai thin Thanliana hian a nunhlui kalsanna’n boxing a luhchilh a; LPS Pro Fight-a a tel hmasa ber 2023 khan middleweight title fight-ah Chawngtlai boxer C. Lalhruaitluanga a hneh lo.
Kha inhnek kha pro boxing a khelh hmasak ber a ni nghal a, tun hi a inlan vawihnihna tur niin, amah aia tawnhriat ngah Yuvraj-a laka chak ngei turin a inringtawk.
Thanliana hian 2024 Pro Fight title fight-ah Hruaia laka a tlawm tawhna chhangletin a vawikhatna’n middleweight-ah a champion a, he inhnek hi boxrec-a ziahluh a ni lo ve thung.
A hmaa ding tur Yuvraj chuan pro boxing vawinga khel tawhin, tum li a chak zingah knockout-in vawi thum a tel a, tum khat tlawm tawhin, lightheavy huanga khel thin a ni nghe nghe.
Zan hmasa zawk inhnekpui berah WBC India champion Vanlalawmpuia leh Praveen M an intawng dawn a, lightweight-ah round riat tura ruahman a ni.
Mizo zinga pro boxing khel tam ber Awpa hi tum 16 a inhnekna tur a ni a, vawi 11 chak tawhin, tum thum a tlawm a, vawikhat inhnehtawkin, a inhnek hnuhnun vawingaah a chak zawn mek.
A tum kuana’n Praveen chuan pro boxing a khel ve thung dawn a; a inhnek tawhah vawiruk chakin, knockout hmangin vawili hnehna a chang a, vawikhat tlawmin, vawikhat tho draw a nei.
Flyweight-ah round li turin LPS Pro Fight title fight-a vawihnih inlan tawh Vanlalenkawltira leh Lalchhanhima an innuai dawn.
Pro boxing-ah a vawikhatna’n Enkawla’n chak a tum hle a, Mamit tlangval Chhanhima’n professional a luh chilhna tur a ni.
Zan hnih chhung hian professional ni lo inhnek pahnih ve ve zeh tel a ni dawn a; flyweight-ah Hmingdailova leh Allison Lalhmangaiha, lightweight-ah Lalnunthara leh Sebastian, welterweight-ah John Lalhunlawma leh Erik Lalthangkima, heavyweight-ah Frankie leh Lalhriattira an inhmachhawn ang.
Professional ni lo inhnek tur pahnih an awm a, flyweight-ah Hmingdailova leh Alllison M Lalhnangaiha, heavyweight-ah Frankie leh Lalhriattirate an ni.