Inkahhai puang tura Trump-a’n a nawr laiinIsrael-in Gaza hmar chhuahsan turin mipui a ti

Inkahhai puang tura Trump-a’n a nawr laiin
Israel-in Gaza hmar chhuahsan turin mipui a ti
US President Donald Trump-a’n inkahhai a awm theih nana nasa taka a nawr mek laiin Israel chuan Gaza hmar lamah sipai chetna a tam dawn avangin Palestinian-te chu insaseng turin a ti.
Gaza City leh Jabalia-a awm mekte chu chhim lama al-Mawasi tuipui kam hrulah insawn tura tiin an awm meknaah chuan Israeli sipaiten beihpui ‘nasa zawka thlekin khawthlang lam pawh an hrut dawn’ niin an sawi.
Pathianni chhun thleng khan darkar 24 liam ta chhungin Israeli-te chetnaah mi 84 an thi niin Hamas enkawl health ministry chuan a sawi a. ‘A him lai’ an tih, al-Mawasi-a thlawhnain a kahnaah naupang pathum an thi tel niin an nu leh paten an saiw bawk.
Trump-a chuan Pathianni khan ‘Gaza-ah inremna awmtir’ tura tiin ‘mi hrente kirtir rawh u’ a ti bawk.
Inrinni khan Trump-a hian Truth Social-ah Israeli Prime Minister Benjamin Netanyahu-a chu Hamas nen indawr turin ‘tunah hian’ thil a kalpui mek tih a lo tar lang tawh.
Hetih lai hian Israel Defense Forces (IDF) thupuangtu, Avichay Adraee-a chuan Pathianni khan an sipaite chuan Gaza hmar lamah ‘mi firfiak leh a hmunhma tichimit turin’ beihpui an thlak mek tih a sawi thung.
Damdawi ina thawk leh mi chengte chuan Pathianni tuk khan Gaza-ah bomb-a beihna an tawng nasa hle niin Reuters an hrilh a, chenna in tam tak a chhia tih an sawi.
Gaza-a Hamas enkawl civil defence agency chuan Pathianni bik ringawt khan mi 23 vel thah an ni tih an sawi.
Sipai chetna a pun thar mek lai hian indo tihtawpna tur leh Hamas-ten mi an la hrente chhuahna turin palai hna thawktuten thil an buaipui mek zel.
Ningani khan Hamas hotu pakhat chuan inkahhai puang tur leh mi hren chhuah turin ruahmanna a awm a; mahse, Israel-in an la dang rih niin BBC a hrilh.
Qatari palaite chuan ni 12 chhung Israel leh Iran an indonaah inkahhai puan a nih hnu khan US nawrna avangin Gaza-a indona pawh titawp rih turin beiseina an nei sang hle tih an sawi ve bawk.
Trump-a chuan tun kar chhung ngeiin Gaza-ah inkahhai a awm a beisei thu a sawi bawk.
March thla khan thla hnih awh inkahhai chu Israel-in Gaza a beih thar leh hnuah a tawp a. Hamas chu an mi hrente chhuah tura na zawka nawr an duh tih an sawi.
Israel hian March thla tir atangin Gaza-a puihna lutte a dangchat bawk a, chawlhkar 11 chhung an dan hnuah US leh mi thiamten mi maktaduai vel tam avanga thi tur an awm avanga an nawrnain an hawng leh chauh.
A hma ang erawhin kawng an hawng lo va, US leh Israeli ruahmannain Gaza Humanitarian Foundation (GHF)-in puihna lutte buaipuiin an sem ta a. Hei hi Israel chuan Hamas-in puihna an ruk thin vanga kalpuiah an inchhal a, Hamas chuan puhna hi an pha thung.
GHF thil kalpui dan hi UN agency-ten an duh lo hle a. Ni tin deuh thaw puihna dawn tum Palestinian thi leh hliam an awm ziah bawk.
Israel hian October 7, 2023-a Hamas-in an ram beia mi 1,200 chuang an thah leh hren tura mi 251 an hruai phuba lak nan Gaza-ah hian an bei zui a. Mi 56,500 an thi tawh niin Hamas health ministry chuan a sawi.