Inkhawihrawn chhuichianna report pe

Kumin September 21 zana Durtlang Leitana kut inthlak rawnna thleng chungchang chhui tura sawrkarin a ruat Aizawl addl. district magistrate chuan a thil chhuina report hi Aizawl district magistrate, bawrhsap Er Lalhriatpuia hnenah Octgober 7 khan a thehlut.
Thudawn danin Aizawl bawrhsap hian report hi Thawhtanni tlai khan a hnenah magisterial inquiry ti tura ruat addl. district magistrate Mark Lalthanliana hian a hnenah report a thehlut tih a sawi a. Chhuitirtu Home department lamah a thlen veleh dawn tih sawiin, rokhawlhna an neih avangin Thawhlehni lamah an thehlut hman lo a, harsatna a awm loh chuan vawiin – October 9 hian Home department-a pek hman an inbeisei tih a sawi.
Tarlan tawh angin September 21 zan dar 11 hnulam khan Leitanah hian kut inthlakna a thleng a, inkhawih rawnna thil a nih avangin kut tuartu lam hian police-ah FIR an thehlut a, he pawikhawihnaa inhnamhnawih mi 6 chu man an ni a, thubuai siamsak an ni.
Kut tuartu zingah medical doctor pahnih, Synod Hospital-a thawk an tel a. Indian Medical Association Mizoram State Branch bakah Synod Hospital doctor ho leh kut tuartute awmna khawtlang hruaituten magisterial inquiry ti turin sawrkar an ngen a. Hemi ang hian September 30 khan Aizawl district magistrate Er. Lalhriatpuia hian magisterial inquiry ti turin Aizawl addl district magistrate a ruat a, ruat a nih atanga ni 7 ralhmaa a chhuichianna report pe turin a ti a, hun bituk chhung hian report hi thehluh a ni.
Home minister K Sapdanga chuan sawrkarin he thil thleng hi a ngai thutak hle tih a lo sawi tawh bawk a ni.