Inlehkhadenna hmanga in lem sain record siam

Kolkata rawlthar, Arnav Daga, kum 15, chuan inlehkhadenna (playing card) hmanga thil lem siam lian thei ber record a siam. Arnav hian playing card hmangin in lem a sa a, a in lem sak nan hian playing card 1,43,000 a hmang a, a in lem sak hi feet 40 a sei, feet 11 leh inches 4 a sang, feet 16 leh inches 8 a zau a ni a, in lem sak nan hian ni 41 chhung a hun a hmang a ni. Arnav hian playing card hmanga in lem sak nan hian thil charna lam chi reng reng a hmang lo.
A hmaa hetiang record chu Bryan Berg-a siam niin, ani hian Macao hotel pathum lem a siam a, feet 34 a sei, feet 9 leh inches 5 a sang leh feet 11 lwh inches a zau a ni a, he record hi Arnav hian a rawn khum ta a ni.
Arnav chuan record siam tuma a inbuatsihnaah hian a in lem sak tur chu a hmunah kalin an architecture te a zirchiang a, chutah a in lem sakna hmun tur thlangin, hmun hrang hrang 30 vel lai a melh kual hman niin a sawi.
A in lem sak nan hian playing card chiah a hmang a, heng playing card te hi a inkamki dik tur leh awmze nei turin a rem khawm a, a in lem sak lai hian harsatna te pawh a tawk ve a, Shaheed Minar chu a sak zawh dawn tawha a chim a, a ni khat hna chu a bul atanga tan that leh vek a ngai nghe nghe a ni. Record siam tura ni 41 chhung a beih lai hian a zirlai a thlah thlam chuang lo va, “Lehkha zir leh school kal ngai bawk nen, a buaithlak duh ve hle a ni,” a ti.
Arnav hian hetianga playing card rem hi mipa naupang kum 8 mi lek a nih lai atanga tuipui tawh niin, COVID-19 lockdown lai khan a tuipui lehzual a, hun awl a ngah a, a tuina lo ni bawk nen, inzirna hun a ngah a, mahse, hmun awl zau tawk an neih loh avangin a duh anga lianin a siam thei thin lo zawk a ni.