Inpuhna leh insawifiahna…
Kumin kum tawp lam November thlaa inthlang mai tawh tur kan nih avangin political party tin an tang a, election campaign thawm pawh a ring sawt chho viau.
Hetih lai hian, political party hrang hrangin ram kaihhruai an tum dan auchhuahpuia inbeihna (manifesto debate) lam ai mahin, engemaw thila inpuhna leh chumi kaihhnawiha insawifiahna chuan hmun a chang zau rih hle niin a lang a. Press conference tam tak chu inpuhna sawifiahna a ni deuh ber a. Party pakhatin party dang hruaitute activity emaw, thusawi emaw an han lepse a, inpuhna lam hawite pawh a ni thin a; chu chu party lehlamin an lo sawifiah ve leh a, inpuh letna thawm a ri chhuak nghal zat a, inpuh leh insawifiah reng rengin hun an hmang a, chu chu mipuiin kan lo ngaithla thup a. Ram kaihhruai dan tur tawktarh atanga duh thlang thei lo hian, thiam zawk leh dik zawk inrinsiak reng renga hmanhlel chungin mipui hian a tawpah ‘vote’ kan thlak ve leh tawp mai dawn ni maw?!
Election campaign boruakah chuan eng eng emaw han sawifiah ngaite chu a awm nameuh ang; mahse, inpuhna leh insawifiahna lam inthumrawn zui tluk tluk hi chu kan kal pelh a hun ve tawh. Mipui lam pawhin bengkhawn dan chintawk kan thiam a pawimawh bawk.
Mipui dinhmun dawmkan hi ram hmasawnna a ni a. Ram hmasawn leh ram changkangah chuan kuthnathawktute dinhmun a hniam ve ngai lo; a chhan chu kuthnathawktute dinhmun an dawmkan that vang a ni.
India ram hi khawvel ram changkan dan tehnaah ram thang mek (developing country) tih a ni a. Chutah chuan Mizoram hi a hnuaihnung pawl a la ni ve leh chhawng a. Ram thang mek hnuaia state hnufual pawl kan la nih reng chhan hi ‘kuthnathawktute dinhmun chawisan theih loh vang’ a ni ber awm e. Kuthnathawktute dinhmun hi tha ve deuh tawh chu ni se, election kan hmachhawn dan pawh hi a danglam ang a; education emaw, health emaw, environment emaw etc. lama party-ten hma an lak dan tur buk tawn chungin vote kan thlak ve thei tawh ang a; inpuhna leh insawifiahna tih vel mai mai kan bengkhawn duh tawh dawn loh avangin politician-te pawhin election campaign hmanruaah an chelek chhen tawh hauh lovang.