Inrenchem kum puang siin sum renchem chuang si lo – MPCC

Inrenchem kum puang siin
sum renchem chuang si lo
– MPCC
ZPM sawrkar chu inrenchem kum puang siin an inrenchem lo hle tih Congress party chuan an sawi.
MPCC thuchhuah chuan, ZPM sawrkarin inrenchem kum (Year of Consolidation) a puan an hman zawh tawh thu leh hna thawk tura ke an pen tan thu chief minister-in a sawi chu, mipui laka thudik thupna leh lanmawi tumna maiah an ngai tih a sawi.
Inrenchem an puan kumah minister of state rank adviser to CM 5 an ruat a; MLA Fund nuai 150 atangin 200-a tihpun bakah MLA hamthatna an tipung a. CM, speaker leh minister-te bangla bakah an chenna in sum tam taka chei niin, furniture leh sofa nuai 2 chuang man an lei a, speaker hman tur lirthei nuai 28 man vel lei a ni tih a sawi.
‘Heng avang hian sum indaih lohna a nasa ta a, supplementary demand vbch. 3512.33 kan neih phah a, Covid lai tih lohah chuan a san ber tum a ni. Year of Consolidation puan nen a inhmeh lo hle,’ a ti.
Adviser to CM 5-te office enkawlna leh staff-te hlawh atan kum khatah cheng vaibelchhe khat aia tam kal tura chhut niin, Board chairman hrang hrang hlawh Rs.8000 atangin Rs. 40000 ah an tisang a, consultant leh OSD secretary level an ruat nual tih a sawi bawk.
‘Tul loah an party hotute tan post an siamchawp a; Board chairman, consultant leh OSD ah an inruat a, hei hian sawrkar sum hmanna a tipung a. Chuti chunga inrenchem kum kan puang an ti hi an tum an thelh chiang hle,’ a ti.
Congress sawrkar laiin Year of Consolidation hlawhtling takin an puang a, hemi entawn hian ZPM sawrkarin a puang ve tih MPCC thuchhuah hian sawiin, ‘Tumna tak tak an neih loh avangin sawrkar senso nasa takin an tipung a, sawrkar leiba pawh an kum khat leh a chanve chhung lekin vbch 3133.45 in a pung hman a. MNF sawrkar 2018- 2023 chhung khan kan leiba punna chu vbch 8671.79 niin, a punna a sang hle. ZPM sawrkarah hetianga leiba a pun chak zel chuan MNF sawrkar kha a khum thei dawn a ni,’ a ti.
Hetihlai hian Congress sawrkar chhung 2008- 2018 khan sawrkar leiba punna chu vbch 3365 chauh niin, MNF leh ZPM sawrkar hnuaia a punna nena khaikhinin a hniam hle a, tum hnih revenue surplus a awm tih a sawi a ni.