Inrinni-ah Modi-a lalut dawn

India ram inthlanah mahnia sorkarna siam thei an awm lo a, party hrang hrang an indawr kual nghal. India ram politics chanchinin ngaihven a hlawh mek. Hetih lai hian MP ngah ber BJP chu sorkarna siam turin an inbuatsaih a, Inrinni hian Narendra Modi chu prime minister atan lakluh a ni dawn.Modi-a hian Nilaini khan president hmuin banna a thehlut tawh a, tih dan phung pangngaiin amah leh a minister-te chu sorkar thar pian hma chu an nihna lo chelh rih tura tih an ni. Inrinni-ah sorkar thar lakluh a ni ang tih a ni bawk.
2014-ah BJP-in MP 282 an nei a, 2019-ah 303, 2024 inthlanah 240 an nei. Sorkar siam turin MP 272 a ngai a, 32-in an pha lo. NDA-a an thawhpuite’n MP 53 an nei a, chumi rinchhan chuan Modi-a hi lakluh theih a ni dawn a ni.
Modi-a hian vote chhiar ni tlai lamah khan NDA-in sorkar an siam leh ang tiin a lo sawi tawh.
Hetih lai hian Congress party leh an thawhpuite, INDIA tia inzawmkhawmte pawh an indawr a, MP 16 nei TDP, Chandra Babu Naidu-a pawlte leh MP 12 nei JDU, Nitish Kumar-a pawlte an dawr ve nghal.
Nitish Kumar-a hi INDIA dintute zinga mi a ni a, mahse BJP leh an thawhpuite NDA lamah a kal leh. Result chhuah hnuah INDIA-in an hnena kir turin an beisei leh a ni. Nitish Kumar-a hian hemi chungchangah mipui hriat tura sawi a nei rih lo. Naidu-a erawh chuan Nilaini khan NDA-a tel an nih thu a sawi.
Congress party-in MP 99 a nei a, an telna INDIA-in MP 234 an nei. Party dang an sawm luh theih chuan sorkarna siam thei an ni dawn a, result chhuah hnuah NDA leh INDIA an intlansiak zui nghal a ni.
Nilaini tlai dar 4-ah khan NDA an inhmukhawm a, dar 6-ah INDIA an inhmukhawm ve thung. NDA inhmukhawm leh INDIA inhmukhawm hi thu thar nei thei an ni.