Inrinni zan Europe inkhel lian thenkhat thlirna

Inrinni zan Europe inkhel lian thenkhat thlirna
Tuntum hian kartawp Inrinni zana LaLiga, Serie A, Bundesliga leh Ligue 1 inkhel loangsar thenkhat kan thlir thuak thuak dawn a ni.
Atletico barakhaihtu Las Palmas!
Spain ram khawpui pakhat Las Palmas-a Estadio Gran Canaria inkhelah hun tawp hma second tlemte chauh awm tawh tihin Javier Munoz chuan Atletico Madrid goalkeeper Jan Oblak-a dan zawh loh goal khungin, tlakhniam hlauhawm dinhmuna ding mek mualneitu team-in Atletico lakah 1-0 hnehna an chang a, Diego Simeone-a team tan title beiseina a tlahniam lo thei lo.
Atletico Madrid khan point 63 neiin La Liga table-ah pathumna la luah zui hram hram mah se nizan result tarlan hman lohah an chung chiaha pahnihna luahtu Real Madrid-in an mikhual Athletic Bilbao an hneh chuan Atleti lakah hian point rukin an sang tawh dawn a ni.
Beisei loh hnehna an chan avangin Las Palmas khan table-ah 17-na an luah chho a, point 32 nen nghet lo takin drop zone chu an chhuahsan phawt a, nizan result tarlan hman lohah an aia point hniha hniam Alaves-in mualneitu Sevilla an hneh chuan Las Palmas hi an lehpel leh thei ang.
Comeback hnehna changtu Barcelona
Nou Camp thuamthat mek luahlum theih loh laia home match an khelhna Estadi Olimpic Lluis Company-ah Inrinni zan vek khan an mikhual Celta Vigo laka 3-1-a an hnufual tawh hnuah hmahruaitu Barcelona chuan 4-3 hnehna an changlet a, an hnuai chiaha awm Real Madrid lakah point sarihin hma an hruai fal.
Catalan team goal lina hi hun pekbelha Dani Olmo hlawhchhuah penalty atanga Raphinha chhuihluh niin, Celta lam tan hian Borja Iglesias chuan hat-trick a siam.
He inkhelah hian Barcelona chuan Ferran Torres-a goal hmangin hma an hruai zet a; mikhual goalkeeper Vicente Guaita dan zawh loh goal hmangin Torres khan season kal laia a league goal 10-na khungin, Catalan team goal hnih dang hi substitute Olmo leh Raphinha tihluh niin, minute 98-ah Brazilian Raphinha bawkin Barca chakna goal a chhuihlut a, season kal laiah inelna hrang hrang atangin goal 30 a thun tling ta hial a ni.
Tarlan tak angin, nizanah Real Madrid-in palina luahtu Athletic Bilbao an hneh chuan Barca nena an inthlauhna hi a ngaiah an dahlet leh thei ang.
Pasarihna Celta Vigo-in point 43 bak an la hmuh belh zo lo.
Heidenheim 0-4 Bayern Munich
Bundesliga hmahruaitu team hian Harry Kane, Konrad Laimer leh Kingsley Coman-te goal khat theuh thawh hmangin half time-ah sithum faiin hma an hruai hman a, second half-a Joshua Kimmich-a goal khat thawh leh nen Bayern Munich-in nuamsain hnehna an chang a, game li chiah khelh tur awm tawhah point kua zetin hma an hruai fal ta.
Nizan result tarlan hman lohah anmahni hnaihbertu Bayer Leverkusen chuan 15-na luahtu St Pauli hneh se Munich club nena an inkar hi point rukah an dahkir leh thei dawn a, point an hmu zo lo a nih phei chuan an title kawl lai humhim turin beiseina an nei chau zual tawh ang.
England captain Harry Kane khan Bayern Munich tana a game khelh hnuhnung vawirukah goal li a thun tling ta a; Heidenheim muala a goal khat thawh leh nen league kal laiah goal 24 thun tlingin, Champions League nena belhkhawm phei chuan tun season-ah goal 35 a khawl tling tawh.
Kartawp league-ah Bayern hian Mainz an mikhual leh dawn a, a hnuah RB Leipzig leh Borussia Moenchengladbach tum lehin, match thum an khelh tlin hnu hi chuan German title an la fel hman tawhin a rinawm a, May ni 17-a Hoffenheim muala an league game hnuhnungber an khelh hunah phei chuan champion fel diam hman tawh tura beisei an ni!
PSG tlawm lo
chhunzawm zel
Parc des Princes-a 2-1-a an mikhual Le Havre an hneh leh hnuah Paris Saint-Germain chu season kal lai Ligue 1-ah an tlawm lo tluang zel a, Ligue 1 champion hian French top flight-a tlawm lo tluanchhuak thei hmasaber nihna an hnaih zel.
Luis Enrique team PSG manager hian Le Havre an hmachhawn hma chawlhkar hnih liamta khan Ligue 1 title an la fel tawh a; tuna an tum ber chu league-a tlawm loh hlen leh Champions League title hlawhchhuah a ni.
Second leg match-ah Aston Villa hneh lo mah se Paris hian first leg-a an chakna hmangin Champions League semi-final an lut fel tawh a ni.
Inrinni inkhel dangah hun tawp dawna Scott McTominay tauhluh goal hmangin table-a pahnihna luahtu Napoli chuan Serie A mawngphah team Monza lakah 1-0 hnehna an chang hram a, Antonio Conte team hian hmahruaitu Inter Milan chu point-ah an nihrual.
Khelh 33-ah Napoli hian point 71 neiin Inter han pha bawk mah se nizan result tarlan hman lohah defending champion Inter Milan hi Bologna khelmuala an chak a nih chuan Naples khaw team lakah an fal leh hlek ang.