ZPM chu an sawrkar hmaa an insawi dan angin an sawrkar hnu ah an awm lo nasa a, chhiah tihpun loh tur thu sawi thin khan an tipung tih Congress Thalai chuan an sawi.
Ningani khan Congress Thalai huaihawt hian Congress party mite chu Vanapa Hall kawtah an pungkhawm a. Oil-a chhiah lak tihsanna tur, MLA leh Municipal corporator/ councillor hlawh tihsan leh card vara buhfai man tihsan a nihna order copy an hal a ni.
Congress Thalai hruaitute chuan, Council of Ministers thutkhawmah petrol leh diesel chhiah (VAT) 2% a tihsan turin thutlukna siam a ni a; cabinet-in a pawmpui tawh card vara ration buhfai man kg ah Rs.15 ni thin chu Rs.30 a tihsan a ni dawn a, Aizawl Municipal leh Lunglei Municipal-a mayor/ chairman, deputy mayor/ deputy chairman, exectuive corporator/ councillor leh corporator/ councillor te hlawh chu sang taka tihpun a ni tih an sawi.
Petrol leh diesel chhiah tihpun a ni tur hian a man a tih san phah dawn avangin, lirthei chuan man leh hire man, bungraw phurh man, excavator hman man, local taxi leh maxi cab chuan man leh petrol leh diesel hmang khawl hman man a to dawn a, mipuiin nasa takin kan tuar dawn tih an sawi a ni.
ZPM-in an sawrkar hmaa an inzawrhnaah, eng chhiah mah an tih san loh tur thu te, ‘tax holiday’ an puan tur thu an lo sawi tawh chu a rintlak loh zia a tichiang tih an sawi.
Sum renchem sawimawi chungin an theih dan danin mipui sum an chen hiau hiau niin Congress Thalai hian an sawi a. Party mite duhsakna turin sawrkarah nihna sang tak tak siamchawpin, an inzawrhna ber, an VIP – kuthnathawktute harsatna pawh ngaihtuah loin CM adviser, Board chairman, consultant leh supervisor an ruat chawp a. State sum dinhmun ngaihtuah loin AMC leh LMC-a corporator leh councillor te hlawh punna a sang hle tih an sawi bawk.
“Inrenchem sawimawi chunga mipui palzutnaah kan ngai,” Congress Thalai senior vice president Ngurdingpuia Pachuau chuan a ti a. 2018 August 16-a ‘ZPM insiamthatna khawmpui’ hming vuaha hun an hman tumin, Pu K Sapdanga chuan, tangrual pawl a sawrkar chuan Mizorama pung chak ber tur chu tuthlawh chherna ‘pum’ a nih tur thu leh, ‘phai’ chak ber tur chu Aizawl population a nih tur thu a sawi a ni, tiin, “ZPM sawrkara pung nasa ber chu chhiah leh an duhsak zawngte hlawh a ni,” a ti.
Tuna minister Pu Vanlalhlana pawhin an sawrkar hunah chhiah an tihsan dawn loh thu, electric leh tui bill leh chhiah dang an tih pun loh tur thu bakah Asian Development Bank leh World Bank atangin sum an puk ve dawn loh thu, tul miah loa sum hman a nih loh tur thu a sawi tih a sawi a. “ZPM-in chhiah an tih pun loh tur thu leh sum puk lo tura inzuar chungin, thla 7 pawh tling loah cheng vaibelchhe 1789 an puk tawh,” Congress Thalai hruaitu hian a ti.
Insawi dan angin ZPM an awm lo Chhiah tihpun loh sawiin an tipung – Congress Thalai
Get real time updates directly on you device, subscribe now.