Insawnchhuahna atan tih ngai thlen turin CM-in AR hotu hrilh

Aizawl khawpui laili atanga Zokhawsanga an insawnchhuahna atana tih ngai la awmte chu a hnena thlen turin chief minister Lalduhoma chuan Mizorama Assam Rifles hotu ber a hrilh.
23 Sector Assam Rifles Hqrs deputy inspector general Brigadier Girish Upadhya chuan Thawhtanni khan chief minister hi a pisa-ah hmu in lawmpuina a hlan a. Ruihhlo leh dan loa kuhva tawlh dangchata titawp turte, Zokhawsanga an insawn pheina atana Mizoram sawrkarin tih tur a la neihte ziaka a hnena thlen tur leh, Zokhawsanga an ram paltlanga feh ngaiten an fehkawng ve tur an neih fel hma chu phal taka lo paltlangtir turte in chief minister hian a chah.
AR hotu hian a theih anga a lo bawhzui nghal tur thu chief minister hi a hrilh a. Tunhnaia venhimna hna an thawhna kawnga an hlawhtlinna hrang hrang a hrilh bakah Mizo thalai tam zawkte sipaia an tan zel theihna atana tih tur pawimawh an sawi dun bawk.
Thawhtanni vek khan Central Reserve Police Force (NE Zone) additional director general Binod KR Singh, IPS chuan chief minister hi a pisaah hmuin lawmpuina a hlan a. Indian Police Service mi leh sa ni thin, chief minister hial a ni thei chu an chhuang hle tih a hrilh a, Mizoramin a mamawhna kawng tinrengah tanpuia thawhpui turin an inpeih reng tih a hrilh bawk.