INTACH Mizoram Chapter chuan Pu Buanga (JH Lorrain) lehkha leh sulhnu pawimawhte chu bu li ah siamin, Mizoram sawrkar, kohhran leh zirna in archive/ library a dah turin Ningani khan Art & Culture minister C Lalsawivunga kutah an hlan.
INTACH Mizoram Chapter hian Mizo ram leh hnam ro, thil hlu leh pawimawh – khawih theih leh theih loh, hmuh theih leh hmuh theih loh chenin zawn chhuah a, vawnghim turin kum 1984 atang khan hma a la a. Chu hmalakna zinga pakhat chu Pu Buanga Dictionary an tih [Dictionary of the Lushai Language by James Herbert Lorrain (1940)] a a kim lo lai zawn chhuah a ni. Pu Buanga khan a dictionary siamah thil pawimawh tak tak, phek engemawzat a kim lo tih a lo sawi tawh a. Chu’ngte chu zawn chhuah tumin hma an la a. Pu Buanga sulhnu chu Angus Library & Archives, Regent Park College Oxford University, United Kingdom-ah a awm thu hriat a ni. Pu Buanga Dictionary-a kim lo tak chu a lo awm lo a, mahse Pu Buanga sulhnu thil tam tak leh thildang engemawzat, la hmuh ngai loh chu haichhuah a ni. Hengte hi bu 4 – Pu Buanga lehkhathawn leh a lehkha dawn thenkhatte; Pu Buanga kuthnu thenkhat, Dictionary chungchang leh thildangte, Whilom Head Hunters; Darphawka Mumang – ziaktu: C Chama, Theiriat te ah siam a ni.
Lehkhabu hi Mizoram State Archive, Tribal Research Institute, Mizo Language Development Board, Mizoram Legislative Assembly, Mizoram University Library, Synod Archive, Baptist Church of Mizoram leh Aizawl Theological College hnenah hlan a ni.
INTACH-in Pu Buanga sulhnu lehkhabu 4 hlan
Get real time updates directly on you device, subscribe now.
Prev Post