Intelkhawma min beitu an awm – Lalduhoma

Intelkhawma min beitu an awm
– Lalduhoma
Chief minister Lalduhoma chuan tute emaw intelkhawma amah tihchhiat tuma bei thintu an awm tih a sawi.
Assembly Session-ah chief minister hian amah beih a nih dan hi a sawi a. Mizoram buai laiin remna leh muanna a awm theihnan kawng dik zawk nia a hriat zawhin, tuten emaw Parliament-a Committee ah an hek a, MP a nihna atanga paih a ni a; MLA inthlanah ZPM party atangin chief ministerial candidate-ah awmin, thlantlin a ni a, MLA 12 rualin ‘a ZPM lutuk’ tih hmangin an hek a, MLA atanga paih a ni leh tih a sawi.
“Pathian leh bial mipui zarah vawiin thlengin ka la tel thei ve a, sawrkarna kan siam ve thei ta hial a ni. Sawrkarna kan siam tirh atangin a mimal taka min tih chhiat tumtuten min bei a, ‘organised game’ a awm. Zanreiah video call a lokal a, zanreiah chuan chhiat tawh thilte pawh a ni thei tiin kan la lo thei loa, mahse khatiang video call kha a lo ni a, ka block nghal zel. A lokal leh a, ka block leh a, zan khatah pawh phone number hrang hrang atangin a lokal a, engemawchen chhung kha chutiang chuan min tibuai,” a ti.
A tirah chuan a block zel anga, a tawp mai tura a ngaih laiin, khawi lam number zozai nge an neih pawh hriat lohin an lo call tih Lalduhoma hian a sawi. “Kha kha tuemaw nula mal pahnih khat tih a ni thei lo, a phenah khan phiarrutute an awm a, chumite chuan hmanruaah an hmang tih ka chiang a ni. Chutiang chuan mi tih chhiat tumin min bei a, mipui hmaa ka sawichhuah hnu ah a reh ta a ni,” a ti.
Chief minister Lalduhoma hian kumin kumtir lam khan MJA leh Home department-in cyber crime chungchanga workshop an neihnaah phone/ video call a dawn thin thu hi a lo sawichhuak tawh a ni.