Inter Continental Cup champion PSG

Demcember 17, Nilai zan khan FIFA Intercontinental Cup khelh a ni a, UEFA champions League champion Paris St Germain (PSG) chuan Copa Libertadores chu penalty shoot-out ah an hneh a, a vawi khat nan Inter Continental Cup-ah an champion.
Doha khawpui, Ahmad bin Ali Stadium-a Inter Continental Cup final khelhah hian European champion PSG in bul an tan tha a, goal thun hmasa zawkah an tang. Ballon d’Or leh Fifa player of the year chawimawina dawng kawptu Ousmane Dembele tel lova inlan PSG tan hian Khvicha Kvaratskhelia chuan minute 38-naah hmahruaina goal a thun. Kvaratskhelia goal thun hmang hian 1-0 a hmahruai chungin PSG in chawlhlawk an hmang.
Chawlhlawk hnu lamah inkhel a hmuhnawm chhunzawm a, Brazil club Flamengo in an si phurh sut ngei tumin tan an khawh. An khingpuite an nawr na bawka Flamengo hi an hlawhtling a, penalty an hmu. He penalty hi Arsenal leh Chelsea tan pawha lo khel reng tawh Jorginho chuan harsatna tawk lovin a pet goal a, minute 62-naah an si phurh a sut.
Goal khat ve ve an thun hnuin inkhel a hmuhnawm chhunzawm viau a, goal thun tumin an innawr tawn nasa hle. Inkhel hmuhnawm takah goal a luh belh thei tawh lova, hun pangngaiah chak zawk an awm thei lo. Hun pangngaiah chak zawk an awm theih loh vangin penalty shoot-out hmangin champion tur zawk zawn chhunzawm a ni.
Penalty-ah hian PSG si nghak Matvey Safonov of Paris St-Germain a chetha tak zet a, vawi li ngawt an khingpuite penalty pet a dang zawn. PSG lam pawhin penalty pet tha bik viau lo mah se si nghak Safonov chetthat vangin PSG hian 2-1 in hnehna an chang hram a, a vawi khat nan FIFA Intercontinental Cup-ah an champion zui ta a, kum 2025 chhungin a vawi ruk nan trophy lian paruk an hlawhchhuak tling ta chiah bawk.
Inter Continental Cup chu
FIFA Intercontinental Cup hi 2024 atanga khelh tan a ni a, Fifa hnuaia khawmualpui hrang hranga club champion te inelna niin champion hmasa ber chu Real Madrid an ni. A hmingin club parukte inlan bawk mah se UEFA Champions League champion team hi final lut sa an ni tlat thung a, team panga dangte hi chu final a UEFA Champions League champion hmachhawn tur zawnna a ni deuh ber. Football-a khawmual lian deuh CONMEBOL (Copa Libertadores) a champion team in final lut turin vawi hnih tal an khelh hmasak a ngai ve tlat thung. Hei hian football a Europe khawmualte chungnunzia a tichiang nawn leh.