Icfai University Inter LC/VC U 23 basketball tournament May ni 4 aanga khelh an chu May ni 24 zan khan final khelh a ni a; team 64 zet telnaah hian Nursery veng leh Zarkawtte’n final match hmuhnawm an chhawpchhuak a, a tawpah erawh kawr sen ha tlim hmur Zarkawt fans hmaah Nursery veng mipuiin hnehna hlado an chham a, lam an thai zui a, an hlawhtlinna hi infiamna uar vengah hian khawtlang inlungrualna thlentu a ni zui ngei ang.
-- Advertisement --
1st qtr 2nd qtr 3rd qtr 4th qtr
13-20 26-24 26-26 18-21
Zarkawt 83 – 91 Nursery
London boys an ni tlat!
An veng pa chatuan rama chawl ta Pu LT Zama’n (Gnat Lalrinchhana (L) pa) Nursery veng nih nawmzia leh England khawpui London ai pawha a duai bik lohzia heti hian tuna an champion player-te pian hma hian a lo chham fo a:-
Nursery London boys
Pu Ti Ta
Ma To Ni
Pu Ti Ta A Ma To Ni… tiin.
Hei hi veng dang hriatthiampui phak loh, an veng mi leh sate chauhin an veng aiawha infiamna huanga pen chhuak hinte tan an dinhmun derthawn leh hat lai ber pawha an sak rual dual dual hin a ni. An veng boruak chu Hawla Indoor Stadium a ni emaw Sikul tlangah a ni emaw he hla hi an sak tawh phawt chuan a alh a, an chanchin hi bengkhawn zui loh a harin a sak alh zel.
Final inkhel thlir ila…
In lam aanga thlirtute tan Zonet Cable TV Pvt. Ltd. lamin an tihchhuah he inkhel hmuhnawm hi en a tlak tawk lova, minute 19 zetin inkhel a khaihlak bawk!
Mahse… Hawla Indoor Stadium chhungah erawh khuang ri dup dup leh mipui pungkhawm sa hulh hulh karah final whistle hamrik a ni a, hutna chang lo a rem rema inhnawhkhawm karah Nursery veng super star, the silent shooter tia Kanan veng tlangval Mriv hotupa Puitean a hming a lo sak tawh Emmanuel-an 3 pts shooter ha bik a nihzia leh a chet ranna, a passing skill turu tak bakah sakawr patuai tha za zar ang maia ball awmna hmun apiang – boruakah leh court khuhtu carpet enghneng zet chungah pawh ni se a lo awm hman zel a, he nau hian eng chawhmeh nge a ei bik tih tur khawpin a tal pit zung zung zel. Hei hi court chhunga player dang pakuain an neih ve loh a ni!
Zarkawt hian tharumah an hneh lo zawk a, rebound an la hlei thei lova, 1st qtr-ah point 13 chauh neia bul an an hat loh an tuar.
Nursery veng tan Emmanuel-a bakin point a nei lem lo tih a lang reng a, defense-ah he player hi dah ha turin player an siksawi hlei thei lo leh 3 pts an luh theih loh zanah pawh an palian player-te’n a chhunga ball an keng lut ngam lo te, ball sem kual (rotation) ha an nei hlei thei lote kha an ui zui ngawt ang.
An star player Hnehpuia kutah hnehna awm hin kha a bo va, point 13 chiah a nei thei. Ruatkima (20 points) erawh a khel chhe lo nang a; Sangzela (18 pts) leh Remruata (16 pts) pawhin thlawp ha viau bawk mah se an defense a pherh tlat leh an chingfel hman lo kha an tuar!
Nursery veng palian Hmingsanga leh Tetea-te’n tawnhriat an la nei tlem tih a hriat a, an tlin tawk chin an hre thung. Hemi te pahnih hi MSL thlenga invawrh dawrh thei turin an pianfung a fuh bawk – inzir zui rawh se.
Miller-a (12 pts) erawh 4th qtr tirah khel zui thei lo tura hrem a ni – a la naupang a, thlak ngai a nei tih a inhriat phawt chuan player ha zawk a la ni ang. Sim hen tur leh her rem hret ngai a kawl.
Reuben (13 pts) erawh player ha veng tan a ni a, a aia sang thlen tum rawh se. Kum tam lo inkhel ho tawh an nihna a lang a, eng tiat nge an nih a lang ta bawk e.
Khaikhawm dawn ila…
Zarkawt khelh chhiat ber zanah Dinate ang langsar vut si lo angkaizia kha a chhuah rualin a lang.
Dino kaihhruai team tan hian chak loh hrehawm dawn hle mah se ‘nomawi a rawn let ta e’ tia Zarkawt pheia an champion hun hi a hnai ta hretin a lang, an tlangvalte fuihtu veng mipui ‘smart’ an tam.
Nursery veng tan erawh lawm hun a ni, champion lawm zawhah boruak sanga inthunun zo lo ten player ha nihna chance a tlemzia an hrechiang zual mai ang.
An coach Atluanga hi fak phu a ni a, a phena Albert-a leh Solomon-a bakah an team phuarkhawmtu LC member-te hian an veng hming tihatute tha tichak zel teh se.
Hoops Mania Time Out
Khualha, Norman Isaac chahchhuaktu Mriv an fakawm a, he inelna hi hetianga a hlawhtlin theihna tura MBBA lamin Mriv a thlawpna hian rah duhawm thlen ngei teh se.
India rama basketball huanga technical director meuh Mriv lamin an chahchhuah hian tualchhung referee-te tan hlawkna a fun tel a, mahni buzawla hmasawnna tur duhtawk leh duhthawh taka zawhna leh chhanna ‘referee clinic’ hun chep tak kara an neihte kha Norman Isaac pawhin hlu a ti hle.
“India rama U 23 tournanent ka chhim tawh zawng zawngah tun uma Mriv-in inelna a buatsaih aia ropui leh changtlung, fans tamna hi ka la tawng ngai lo! Ka nau Mriv-te ka chhuang hle,” tiin The Aizawl Post Hoops Mania hnenah Mizorama basketball nunzia a sawi.
Lawmman dawngte:
Most Valuable Player
Emmanuel, Nursery
Most Promising Player
Steven, Bvt
Defensive Player of the tourney
Ruatkima, Zar