Inter leh Napoli an inum

Italian Serie A-ah champion tumin Inter Milan leh Napoli te an inum chhunzawm zel. Pathianni zan khan Serie A table chung lam luahtu pahnihte hian hnehna changin point thum an hmu ve ve.
Serie A champion Inter Milan chuan Stadio Giuseppe Meazza-ah Udinese an mikhual a, an mualah 2-1 a hnehna changin hma an hruai chhunzawm zel. Table chung ber luah nghet tura chak mamawh Inter Milan hian an mualah bul an tan tha viau a, chawlhlawk hmain goal hnih ngawt an thun hman. Inter tan hian Marko Arnautovic chuan inkhel tan atanga minute 12-na lekah hmahruaina goal a thun nghal. Hma takah goal an thun vangin an phur a, inrintawkna sang zawk nen an inlan chhunzawm bawk. Champion nawn leh ngei tuma tan khawh Inter tan hian Davide Frattesi chuan minute 29-naah an goal hnihna a thun zui leh a, 2-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm zui viau a, team hnihte an inhnehtawk hle. Goal lut a awm belh thei lawk loh hnuin mikhual team Udinese tan Oumar Solet chuan minute 71-naah goal thunin an si phurh a sut then. An si phurh sut zawh ngei tumin Udinese in tan khawh bawk mah se hun tawp thlengin goal an thun belh thei tawh lova, champion lai Inter Milan lakah an tlawm zui ta a ni. An mualah an chak leh tak vangin Inter Milan hian pen khatin champion nawn leh an hnaih.
Pathianni zana inkhel dangah pahnihnaa awm mek Napoli chuan 2-1 in an mikhual AC Milan an hneh a, Inter Milan kal fal tur an chelh chhunzawm zel.
Napoli hian an mualah bul an tan tha viau a, Matteo Politano chuan inkhel tan atanga minute hnihna lekah hmahruaina goal a thun. Hma takah goal an thun hian nasa takin a fuih phur a, inrintawkna sang tak nen an mualah an inlan. Hma taka goal an thun hnuin Romelu Lukaku chuan minute 19-naah an goal hnihna a thun zui leh a, 2-0 a hmahruai chungin chawlhlawk an hmang.
Chawlhlawk hnu lamah season kal meka chetha lo AC Milan in point hmuh ngei tumin tan an khawh a, goal khat an thun. Milan tan hian
Luka Jovic chuan hun tawp dawn hnaih minute 84-naah goal thunin an si phurh a sut then a. Napoli lakah point hlawhchhuah tum viau mah se an puitlin zo lova, uiawm takin an tlawm zui ta a ni.
Italian Serie A season kal mekah champion lai Inter Milan in vawi 29 khel tawhin point 67 an hmu mek a, an hnuai chiaha awm Napoli nen khelh inzatah point thumin an la inthlau. Khelh hmabak khelh kua la awmah Inter Milan leh Napoli te hi champion tumin an inel nasa hle ngei dawn a. An ni pahnih inel hian Serie A a ti ngaihawm viau nghe nghe a ni.