Inter Miami in final an lut

August 23, Nilaini khan US Open Cup semi-final khelh a ni a. Inter Miami chuan si hnih an phurh hmasak zet hnuin Cincinatti an lehthal a, penalty shootout ah chakin Lionel Messi leh a pawl ten hnehna an chang a, final an lut. Messi an neih hmasa chak hlei thei lo Inter Miami hi Messi an neih hnuah an chak ta char char rih a. Trophy lian pahnih la zawn turin vawi khat chak chiah an mamawh tawh.
League Cup champion thar Inter Miami hian semi-final-a an khingpui Cincinatti lakah bul an tan chhe lo viau a, si hnih an phur hman hial. Hun tawp an tlawm ve dawn te nge nge emaw tih hnu hun tawp dawn hnaihah an si phurh an sut hram a. Extra-time ah goal thun hmasa zawk ni mah se an hmahruaina an hum thei bik lova, tie-break hmangin final lut tur zawk tih chian a ngai a. Messi khelhna Inter Miami chu vannei zawkah an tang ta hlauh.
Lionel Messi an neih hnua team hlauhawm ni thar ta thut Inter Miami CF lakah Cincinatti in bul an tan tha a, minute 18-na lekah Luciano Acosta chuan hmahruaina goal a thun. Hma taka an goal chhuah sut tumin Inter Miami in tan khawh mah se an si phurh an sut mai thei lova, si khata hnufual zawk chungin chawlhlawk an hmang.
Chawlhlawk hnu lamah Cincinatti an khel tha chhun-zawm a, goal an thun leh thuai. Minute 53-naah Brandon Vázquez chuan an goal hnihna thunin an hmahruaina a tizau a, final an hnaih kuarh tawh. An khelh dan enin Cincinatti hian hnehna an chan zui mai a rinawm hman viau a, an kelh that em vangin Lionel Messi pawh pawh a langsar hleithei meuh lo. Chak ngei tura inngaiin an inlan a, hun tawp dawn hnaiah goal hnih an chhua ta tlat thung.
Si hnih faia an hnufual vangin Inter Miami an nguai hman viau. Minute 68-naah Leonardo Campana chuan goal thunin an si phurh a sut then. He goal hian chak theih beiseina a siam a, an phur thar ve leh. Hun pangngaiah an si phurh an sut theih loh hnuin minute 90+7-ah Leonardo Campana chuan hnai tak atanga tauh goal in an si phurh a sut zo ta mai a, mak tak maiin tlawm an pumpelh.
Hun pangngaiah 2-2 a an inhnehtawk hnuin minute 30 dang an khelh belh a, Inter Miami in goal thun hmasa ve ta thung. Minute 93-naah Josef Martínez chuan hma an hruai letna goal a thun. Hnufual zawk an nih hnuin Cincinnatti in thapui an chhuah thar leh a, minute 114-ah Yuya Kubo chuan an si phurh a sut a. 3-3 in an inhnehtawk zui ta a ni.
Hun pangngaiah 3-3-a an inhnehtawk hnuin penalty shootout hmangin chak zawk tur zawn chhun-zawm a ni a. Inter Miami FC in an pet goal vek laiin Cincinatti tana pettu pakhatin a thelh a. Inter Miami chuan 5-4 a hnehna changin final an lut a, trophy lak belh leh turin vawi khat chak chiah an ngai tawh.