Inter Village Football 2024 champion Kolasib Joint Village Council

Inter Village Football 2024 champion Kolasib Joint Village Council
GIG Motors All Mizoram Inter Village Football Championship 2024 chu December ni 12, Nilaini zan khan khelh zawh niin, RG Stadium, Mualpuia final inkhelah Kolasib Jt. VC leh Ramhlun North LC-te hun pangngaiah sihnih ve ve thunin an inhnehtawk a, hun pek belhah pawh 3-3 a la nih cheu avangin penalty shoot-out hmanga pawhthen an ngai a, tah hian 5-4 hnehna changin Kolasib Jt. VC an champion ta a ni.
First half-ah goal hnih a lut a; goal hmasa ber hi inkhel tan atanga minute 32-ah Kolasib Jt. VC tan mual veilam sir atanga MS Dawngzuala ball pek tha zet chu box-a awm PC Pazawna’n a khung.
Minute riat a ral leh hmain Kolasib Jt. VC bawkin an hun tha hmuh hmangtangkai lehin box chhunga Isaak-a ball pek tha zet atangin Paul-a’n an goal hnihna a khung.
Second half-ah goal hnih a lut bawk. |an atanga minute sarihnaah Ramhlun North tan Rodina chuan a hun tha hmangtangkaiin an siphurh a sut then a; chu mi atanga minute thum a ral hmain Lawmtea’n a penalty hlawhchhuah hmangin am siphurh a sut a, goal dang luh belh tawh loin hun pangngai an hmang zo.
Hun pek belh an ni a, minute 91-ah Kolasib Jt. chuan hun tha an neih chhawrin Zothansanga’n an goal thumna a tilut.
Ramhlun North lamin extra time hun pekbelha an chance tha hmuh hmangin Remtluanga’n an siphurh sutna goal a khung ve bawk. Hnehna chang zawk awm loin 3-3 a ni leh.
Penalty shoot-out hmangin chak zawk zawn a ni a, Ramhlun North LC tan Rodinmawia’n a pet goal loh avangin Kolasib Jt. VC chuan 5-4 hnehna changin, champion no mawi an chawi ta a ni.
Kolasib Jt. VC hian Rs. 2,00,000 bakah sial leh trophy dawngin, pahnihna Ramhlun North LC kutah Rs. 1,00,000 leh trophy a lut.
Semi-final paltlang zo lo team pahnih Tlangnuam LC leh Melbuk VC-te’n Rs. 50,000 ve ve an hlawh a; fairplay dawngtu Kolasib Town VC-in Rs. 50,000 leh trophy an dawng.
Tournament-a best player atana thlanchhuah Paul Ramfangzauva (Kolasib Jt. VC) kutah Rs. 10,000 leh trophy lutin, top scorer lawmman dawngtu F. Lalhmangaihzuala (Thenzawl Jt. VC) pawhin Rs. 10,000 leh trophy bawk a hawn.