Inthianthatna indaltir tum lo Sabalenka
Inthianthatna indaltir tum lo Sabalenka!
Nimin khan Australian Open 2025 women’s singles champion lai Aryna Sabalenka chuan 6-2 2-6 6-3-a Russian 27th seed Anastasia Pavlyuchenkova hnehin semi-final a lut a, inkhelh banah last four match-a a hmachhawn tur Spaniard Paula Badosa chu a thian tha tak pawh ni mah se la a zawna Melbourne title vawithum lak tlin a tumna kawngah indaltir a tum loh thu leh khelmual chhungah thianin awmzia a neih loh tur thu a sawichhuak!
Sabalenka leh a thiantha tak Badosa hi khelmualah vawisarih intum tawhin, tah chuan Belarusian hi vawinga chakin, Spaniard hi vawihnih a chak ve thung a, an head-to-head record en chung leh champion lai nihna zawnah Sabalenka hi tuntum Australian Open last four match-a an intum turah hian rinkai zawk a ni lo thei lo!
Tarlan tawh thin angin, world number one Sabalenka hian kum 26 zet liamtaa Martina Hingis-i’n hard-court Grand Slam title vawithum a lakzawn kha tluk a tum ve mek a, chu ngawt pawh chuan tumruhna sang tak a neihtir ngei a rinawm.
Nimin inkhelah Sabalenka khan French Open finalist pawh lo ni ve tawh Pavlyuchenkova lakah set hnihna hlohin, kha kha kum 2023 final hnu lama Australian Open bika set a hloh leh vawikhatna niin, kha mi kum khan Elena Rybakina lakah set hloh mah se a career-a a major singles title hmasaber a hlawhchhuak ta tho a nih kha…
Top seed Sabalenka hian a career-a a vawi 10-na atan Grand Slam semi-final a khel dawn a; final luh inchuha a tum tur Paula Badosa chuan nimin inkhel dangah rinkai lo zawk ni chungin third seed Coco Gauff lakah 7-5 6-4 hnehna a sualchhuak a, last four-ah fiahna lian zawk a hmachhawn zui leh dawn a ni.
Tun kha Russian Pavlyuchenkova tan Grand Slam quarter-final vawikua a khelh tawha vawiriat a tlawmna niin, kum 33 mi hi inkhelh banah a beidawng hle a, “Tennis khelh hi ka mir lo a ni,” a tichhuak hial!
Inkhel danga chak Paula Badosa pawh kha Grand Slam quarter-final a khelh hnuhnung pahniha tlawm ve ve a ni a, tennis chawlhsan mai a tum rum rum atanga kum khat hnuah Grand Slam semi-final hial a thleng zui ta a ni.
World number two pawh lo ni ve tawh kum 27 mi Spaniard hi hnungzang nain a bawhpet rei em avangin kum hnih chhung zet a bahlah avang khan ranking lamah pawh 140-na a ni duai tawh a, mahse, nikumah khawng zetin khelmualah a kir leh thei a, kum 2024 khan WTA Comeback Player of the Year award pawh a dawng hial a; kuminah pawh a comeback chu chhunzawm zelin, match 13 chak zawn mek American Gauff-i lakah hnehna a chang zui leh thei a ni!