Inthlan au hla chu kawng

Tunlaia Mizoram titi ber chu kawng chungchang hi a ni mai thei. Inthlang tur Dampa bialah pawh kawng chungchang hi titi a tling a, inthlan au hla ber pawh a ni awm e.
“Mipuiin an sawi a, party lamin kan sawi bawk a. Party tinin kawng chungchang hi kan sawi a, mipui lam atanga zawhna tam ber pawh a ni,” party pakhata an campaigner, Dampa biala zin kual mek chuan a ti.
Media lamin inthlana dingte an kawmin kawng chungchang hi an zawt zel a, youtube lamah pawh kawng chungchang hi an sawi deuh zel tiin a sawi theih ang.
Kawng chhia vang hian mipuiin harsatna an tawh bakah campaigner-te pawhin harsatna an tawk a, an tum ram thleng ta lo te, thlen har phah te an awm nawk. Silsuri-ah phei chuan motor a luh theih loh avangin election observer-te pawh helicopter-in an kal.
Silsuri hi inthlan puan hlimah khan an kawng a chhiat avangin motor a lut thei lo a, a hnu deuhah chuan a luh theih lai a awm; ruah a sur loh chuan a lut thei an ti.
A bial mite sawi danin, Aizawl atanga khawthlang lama kalin Dialdawk velah kawng a lo chhe nghal a, chumi pelhah chuan a zia deuh. Dapchhuah vel a chhe leh a, mahse West Phaileng thlengin a zia leh. West Phaileng leh Marpara inkar a zia a, Marpara pelh atangin a chhe leh. Marpara atang hian lawngin Silsuri an kal thin.
|uahzawl leh Rulpuihlim inkar a chhia an ti a, Bawlte leh Darlung inkara tun hnaia kal pakhat chuan a chhiat thu sawiin, motor thaa an kal chung pawhin a hahthlak thu, motor-in lei a hrut nasat thu a sawi.
Aizawl atanga Reiek kawng pawh a tha lo an ti a, Reiek thlang lam pawh a tha lo an ti. Reiek leh West Lungdar inkar phei chu khuar a tam tih a ni deuh zel. Tun hnaia Presbytery Inkhawmpui-ah pawh kum danga langa kal thin zingah kawng a chhiat avanga riak an awm nual tih thu dawn a ni.
Dampa bialah hian khaw 30 vel a awm a, hmun 41-ah vote thlak a ni ang. Khaw hrang hrangte hi a kalna kawng a inpersan hlawm a, Aizawl atanga kal ngai te, chhim lam atanga luh ngai te, khawthlang lama kal ngai te a nih nawk avangin khaw hrang hrang tlawh tur hian hun a duh hrim hrim bakah kawng a lo chhiat avangin harsatna a thuah hnih tih thu dawn a ni.