Inthlan buatsaih dan thlirlet

Kolasib district election officer John LT Sanga hoin an district-a sector officer-te, Flying Squad Team leh Static Surveillance Team leader-te chuan MLA inthlan buatsaih dan thlirletin Thawhlehni khan an thukhawm.
DEO chuan Kolasib district-ah inthlan felfai leh hlawhtling taka vote thlak zawh a ni chu lawmawm a tih thu sawiin, inthlan kaihhnawiha thawktute theihtawpa tantlanna vang a ni tih a sawi. Mizoram People Forum, kohhran leh tlawmngai pawlte hmalakna leh election official-te an thawhpuina chu inthlan felfai chhan pakhat a ni, tiin, hei hi India ram chhung hmun danga awm lo, Mizoram kan vanneihna a ni, tih a sawi a ni.
Inthlana duty-ten an duty-naa an thil tawnte a sarhu laia an sawi ho nan leh, tha an tih zawng leh hmasawnna tura an rawtnate atanga nakin zel atana tangkaipui theih tur leh inzirna tur a awm theih beiseia thlirletna hi ruahman a ni tih a sawi bawk.
Thutkhawmah hian DEO hi returning officer-te, election officer, assistant RO-te leh DIPRO ten tawiawmin, Kolasib district-a sector 16-a sector officer-te leh he district huamchhunga assembly bial pathuma FST team hnih leh SST team hnih theuh awmna leader-te an tel. Inthlan vuakveta an duty-naa an thil tawn hrang hrang sawiin, hmasawnna tur rawtna an neihte an thlen a. District election office atanga bawhzui theih leh thuneitu sang lama bawhzui ngai tur thil pawh sawi ho a ni.