Inthlan chanchin hlimawm

Inthlan a hnai a, candidate nih tumte tan chawlhkar liam ta kha hming pekluh (nomination file) hun a ni. Thil hlimawm tak tak sawi tur a awm a, nuihpui bawk bawk tur khawp te pawh a awm.
MLA inthlan hi kum nga dana thil thleng a ni a, hming pelut thang a awm theih tak tak loh ang; a lo tih tawh tan pawh theihnghilh lehna hman a awm a, a vawi khatna nih vanga kawng bo fe fe an awm bakah a lo ti tawhte zingah pawh puih ngai fe fe a la awm theih ang.
Mizoram district pakhatah chuan hming peluttu turin dahkham (security deposit) tur pawisa a nei tlat lo!
Candidate nih tuma hming an pekluh hian Rs 5000 an dahkham thin a, candidate nih tum pakhat chuan Rs 5000 hi a lo kawl lo palh! Pawisa a nei lo a ni lo a, a ak lo a ni zawk. ATM a lo hman theih loh a, pawisa fai keng lovin hming pekluhna hmun a pan ta tawp mai a ni awm e.
Thu dawn danin, inthlan buaipuitu turte office-ah pawisa an zawngkhawm chawp a, mahni ah remchan ang ang thawhkhawma Rs 5000 an tlin hnuah nomination chu an file ta a ni. Gpay hmangin a rul nghal vek tih thu dawn a ni.
Candidate nih tum pakhat chuan ‘no’ tih thaina turah ‘yes’ tih a lo thai vek a, criminal case i nei em tihah te pawh a lo ‘yes’ a, a chhanna a dik si lo a, a thai tha leh.
District pakhatah pawh pa pakhat hian ZPM reserve tur ka ni tiin hming pekluh a tum a, mahse chutiang tura ruat a lo ni lo tih hriatchhuah a ni.
Candidate atan hian reserve a neih theih a, candidate tur kha a rem leh lo emaw scrutiny-ah a tla emaw a ni thei; chutiang thil a lo thlen palha a aiawhtu turin reserve hi a neih theih. ZPM reserve candidate tur ka ni inti pawh hi dan angin party lehkha an lo dil a, a lo nei lo. ZPM candidate tur an han zawtfiah a, ani’n chutiang engmah a lo hre lo! Independent-in ka file mai ang a ti a, mahse file turin ST certificate (tribal certificate) a lo nei lo! ST tan chauha din theihna bial a ni si a, a file thei ta lo!