Inthlan hun ruatah ZPM chiai lo – K Sapdanga

Mizoram inthlan hun tura ruat chuan party dang a tichi ai a nih pawhin an party chu an chiai phah ve loa, a aia hnai nise an duh zawk tih ZPM working president K Sapdanga chuan a sawi.
Aizawl North-III bial huamchhung Electric Veng ZPM Information Office hawnnaah ZPM working president chuan Election Commission of India-in inthlan hun atana November 7 a ruat chu party dangte a tichiai a ni maithei a, ZPM party chu a barakhaih loa, hei aia hnai hi ni se an la duh zawk tih sawiin, “Kan inbuatsaih hma deuh avang khan nuihsawh hlawh tawh mah ila, kan rin phak hauh lohin remruattu fel takin rem a ruat a ni ang tih kan ring a, lawm takin kan pawm a ni,” a ti.
Aizawl North III biala ding turte chu tuna ruling MLA ni mek, mi fel tak, nungchang tha, hawihhawm, nelawm tak niin, pakhat zawk chu minister thil ti thei tak ni chunga kum 10 min lo enkawl tawhtu a ni tih ZPM tana he biala ding tur K Sapdanga hian a sawi a. Bial tana an sulhnute a chhuanawm takzet tiin, “Keini hian corruption laka fihlim intiam, party sawrkar ni lo, kalphung thar mipui sawrkar kan aupui a, hma amite sulhnu tha chhunzawm thei turin mipui ka dil a ni,” a ti.