Inthlan la puang lo leh

Tun hnai ni hnih ni thum chhung chu politics ngaihvente’n inthlan an puang tawh mai thei an ti ni tin a ni ber a, mahse Zirtawpni thleng kha chuan an la puang lo.
Zirtawpni khan Election Commission of India (ECI)-in state pangaa inthlanpui lo awm tura observer atana ruatte an kokhawm a, hei vang hian inthlan an puan nghal ring an awm. Mahse an puang ta lo.
2018 inthlanpui kha 2018 October ni 6-ah an puang a, hei vang hian Zirtawpni kha mi thenkhatin an ngaihven. Observer tur an kokhawm bawk nen, inthlan an puan rinna a lian hle. Mahse an puang lo a, thu thar a awm lo.
2018 inthlanpui dawna ECI-in inthlanpui an puan ni kha Inrinni a ni a, chuvangin kumin October ni 7 pawh hi inthlan puan ni a nih ring an awm.
Election department lam pawhin eng thu thar mah an hriat loh thu an sawi a, inthlan puan hun tur hi an hriat a tul loh thu leh, sawi tur an neih loh thu an sawi.
Election department hian October ni 4 khan electoral roll an tlangzarh a, hemi hnu hi chuan Mizoram inthlan hun tur hi puan theih reng a ni tawh.
Sorkar ding lai hian December ni 18 thleng hian hun a nei a, 2018 December ni 15-ah sorkarna an chelh tan a ni.
2018-ah khan October ni 6-ah inthlan puan a ni a, November ni 28-ah vote thlak niin, December ni 11-ah vote hi chhiar a ni.
Kumin kum tawpa inthlang turte hi Mizoram bakah Chhattisgarh, Madhya Pradesh, Rajasthan leh Telengana te an ni a, inthlang tur state-te hi ECI-in an tlawh kim tawh. An tlawh hnuhnun ber Telangana an tlawh hnu khan inthlan puan hun tur hi politics ngaihvente’n an nghak ta a ni.