Inthlan senso bituk chin dan tur duang

Kumin MLA inthlanpuia candidate-te senso chhutna tura man bituk ruahman sa siam a ni a. Hemi chungchangah hian Nilaini khan Kolasib leh Lawngtlaiah a buaipuitute an thukhawm.
Kolasib ah district election officer, bawrhsap John LT Sanga hoin ‘rate chart’ hi siam a ni a. Lawngtlaiah chuan deputy DEO Abraham Beirazi Khithie hoa neih a ni. Inthlan campaign nana bungrua leh thildang mamawh awm thei turte ngaihtuah a ni a; hall, thutthleng, sound system leh eitur chi hrang hrang man bakah lirthei hman man, flag leh banner siam man, cable TV leh chanchinbua pek chhuah chi fakna tihchhuah mante bithliah a ni. Hemi zulzui hian candidate-te campaign senso chhut a ni ang.
Thutkhawmah hian election officials – ERO, AERO leh DIPRO te bakah political party hrang hrang aiawhte an tel a ni.
Election Commission of India chuan inthlan campaign sensoa candidate-te sum hman theih zat a bituk angin, kumin Mizoram MLA inthlanpuiah hian candidate pakhatin campaign sensoa sum a hman theih zat chu cheng nuai 28 a ni.