Inthlan vote chhiar hun sawnah MKHC, NGO leh party lungrual
Mizorama MLA inthlanpui neih turah Election Commission of India-in state dang inthlang ve te nen a ruala December 3-a vote chhiar tura a tih chungchangah, Pathianni a nih avangin Mizorama kohhran, tlawmngai pawl leh political party te chuan sawn an duh vek a. Sawn an duhna thu hi a tam zawk chuan ECI hnenah thlen tawhin, NGO leh party-te hian a tul anga na zawka nawr an tintuah.Mizoram Kohhran Hruaitute Committee (MKHC) chuan MLA inthlana vote chhiar hun atana ECI-in Pathianni a ruat chu Kristiante ni serh leh pawimawh a nih avangin an duh lo hle tih a sawi a. October 11 khan chief election commissioner hnenah ziakin ngenna a thlen.
MKHC chuan kumin inthlanpui result chhiar hun December 3 chu Pathianni a nih mai bakah Bible Sunday a nih tel avangin Mizorama Kristiante ni serh, inkhawm bakah hun pawimawh hrang hrang neih thin a ni tih a sawi a. Hei vang hian an ngenna ngaipawimawh a, vote chhiar hun hi Inrinni leh Pathianni ni loa sawn ngei turin an ngen tih ECI hnenah hian a thlen.
Nilaini vek khan Central YMA huaihawta NGO leh political party thukhawm chuan vote chhiar ni atana Pathianni ruat a ni chu an duh lo tih an sawi a; Pathianni leh Inrinni tih loh nidang ruat zawk tura ECI hnena ziaka thlen nise, tiin an rel. ECI-a an ngenna hi a hlawhtling lo a, Pathiannia vote chhiar hi tih tlang a nih dawn chuan a tul anga hma lak dan tur ngaihtuah leh nise an ti bawk.
Thutkhawmah hian Central YMA, MUP, MHIP, MZP leh MSU bakah political party atangin MNF, INC, ZPM, BJP, AAP leh ZNP aiawh an tel a ni.
Hetihlai hian BJP Mizoram State chuan MLA inthlanpuia ECI-in vote chhiar ni atana a ruat December 3 chu Pathianni a nih vangin BJP Mizoram chuan tha lo a ti hle a, Inrinni leh Pathianni chu Mizorama Kristiante ni pawimawh a nih avangin vote chhiar ni thlak turin ECI-a hian State president Vanlalhmuaka hmingin ziakin ngenna a thlen a. Hemi hma hian a hran theuhin Mizoram People Forum bakah political party – MNF, INC leh ZPM chuan ECI hnenah hian vote chhiar ni sawn tura ngenna an thlen tawh a. PC party chuan sawn tura ngenna thuchhuah a lo siam tawh bawk.