Zoremi Hmar Zote
-- Advertisement --
Inthlan pui, MLA thlan hun kan lo thleng leh ta reng mai. Kan duh tak kha kan thlang leh dawn a, kan party aiawha ding ngei mai kha kan han thlang leh ang a. Eng ang mi pawh ni raw sek; kan party mi leh sa tawh phawt chu thahnem ngai em emin kan vote mai pawh duh tawk lovin, kan sawi vul mawi leh chhiai chhiai tawh hlawm mai si a. Kan duhthusam ang taka kan thlan tlinte enkawlna hnuaiah, kan duh taka kan siam kan khawtlang, kan ram inrelbawlnaah kan lungawiin, kan thlan tlinte chungah kan lawm nasa leh chuah chuah ang chu!
Party aiawha dingte chu:
‘Mi tha chauh thlan tur a ni e’ kan ti deuh vek a, kan candidate-te an han campaign-pui tak tak mai a, mi tha tak tak hlir mai an lo ni si a. Mi tha hlang kaihhruai ram, vêng ni si hian kan lungawi leh ngai chuang miah lo. Kan ring tawk a, kan hma min hruaisak a, ei leh bàr, zirna kawngah leh, kawng hrang hrangah an thla hnuaia inphèn a, hmasawnna kawng an sial sa kawng zawh ve turin, kan zui turin an ni hi kan thlang a ni. An thatna leh an felzia te, an tlinzia leh Pathian an tihzia te, an thawhpui ten an thlawhhma sawi hmiah hmiah zel mai si a. Fiah vek sèn an nih thin si loh avangin a dik a dawk thlu mang lova chhàn loh aiah Paula ti thin tam tak chuan kan pawm hmiah a, kan lo vote mai thin.
Thingtlâng lamah, eng sawrkar pawh tling se, sawrkar thar party worker, Lung hrit chengkawl ang chauha chhe bawl ve hrit hret, pawr ve fe fe ni thin, chawlhni tlaia register bu chul lam tawh zakzeha committee deuh sek, an sawrkar atanga kum khat hnu vela tuikuk retailer fa tlùm mùm taka mûm ta nalh hi khaw tinah an awm an ti! Tun hnai mai an sawi lo, hman ata tawh a ni, an sawi ni! Tu chhùnin nge maw ram hmangaih vanga in leh lo te sa tha a, thlêng tlâng mawm hmarha thlasik arpui thàu taka an thàu tâk a, an hausak thut ziah hlawm ni! Aizawl veng thenkhatah pawh a ni tho ang; duh ula sawi tur in hre ve em em ang!
Chaltlanga awm kan ni a. Kum 2015 khan Local council member atan kan thenawmnu, Pi C.Biakveli chu thlan tlin a ni a, a hnuah phei chuan a chairman zui ta nghe nghe. Hmeichhia a nih vanga vawrh tumna lam ni lovin, a dikna leh huaisenna, a inngaihtlawmna leh ram a hmangaihna tak tak kha ka hmuh avangin ka sawi duh tlat. Kan in leh an in hi insi lo chauh, a inkara step lian lo tak awm chauh a ni a. Tukverha dah nikhua leh in chunga han làwn kài nikhua chuan râwl rin vak ngai lovin pangngai takin kan titi thei. Chuti khawpa inhnaih chuan kum sawmhnih chhung kan inthenawm tawh a. Hre chiang inti ngam tur khawpa anmahni hnaihtu kan ni.
|henawm hnai ber ten sawiselna tur kan hriat loh chu mi tha an ni tih hi chiang takin ka sawi ngam! Mi sawi ngai lovin Pathian a tih tih kan hria a, amah leh a campaign-puitu ten an sawi ngai lovin ram leh hnam, vêng a hmangaih tih, a dam chhung khan a lantir a ni. Inthlan dawna a rawn campaign ve dan kha ka la hre reng mai. “Zovi, min hre chiangtu in ni a, ka tha tawk lo a nih chuan kei ka nih vangin mi vote reng reng suh u,” a ti! Ka vote chiang teh asin!
Kan veng chhung kawng chhia zawng zawng thawm that a ni a, step thar, mawi taka siam a ni vek bawk a. Street light a chhî a, veng chhung thil pawimawh engkimah, hmeichhe pakhat hian min âwi hnehin, min enkawl hneh tak meuh a ni. Tunah zawng, vân lamin an duh ve tawh a, an ko haw ta. Zah tak chungin a hming leh kan veng tana a thil tih hi hriat reng a ni ngei ngei tawh dawn a ni. Tuna tling turte pawh hian thlan tlin an nihna bial chhungah, an bial khawtlângah an hmêl a lang thuai dawn a ni tih hi hre reng se la.
Mipui hian mawh kan phur ve!
Mipui hrim hrim ngaihtuah hi chuan party mi leh sa ai mahin àwn lam em em pawh nei lo, Neutral kan tih mai hi kan tam zawkin a rinawm a. Hengho hi kan pawimawh a nia. ‘Party tih vel hi ka tui lo, politics thil hi ka ngaihven peih lo, ka tuina lam a ni lo’ kan ti ngawt tlangpui bawk a. Mahse kan pawimawhzia hi kan ngaihtuah lo a ni mai thei. Party ruihchilh, a chhia a tha pawh thliar hlei thei miah lova mahni ngaihdan awr puar fangra awrh tlat mai, party aiawh candidate thlir ngur mai, a party tana tang ngawt maite rilru ang lo taka, kan veng, kan ram neihchhun tana rilru fim leh thiang tak hmanga, ngaihtuahna fel tak nei chunga vote kan thlak ngei a va tha ve!
Vote thlâk peih loh te hi a ngaihtuah tlêmthlâk lutuk! Vote pawh thlâk peih lo, tu hi nge kan ram leh kan khawtlang hruaitu atan tha ang tih pawh ngaihtuah peih lo khawpa mâwl kan tam! Ram hruaitu nih chu khawi lamah, khua leh tui tha an nih hi mumangah pawh lo ring chhin reng reng suh u! Ram/khawtlang hruaitute demin an sawi chhe ve khanglang fo lehnghal, nuih pawh an tiza lo! Hetiang mi hi chu ram tinin kan kawl nameuh mai, ‘khua leh tui tha i ni lo, nang hi ram thanmawhbâwk chu i nih hi’ va ti ngawt ila dam sen ve luau si chuan an lo haw ve leh tumhrang emaw a ni ang a, dàidùla nghasen ni lum âi ang maia hmai sen hlurin, thinrim engphiarin min lo chhàwn emaw a ni ang a!
Thu belh:
MLA/LC kan han inthlan dawn meuh hi chuan tan hi a’n na khawp ahh… Thil tithei hrang hrang zingah ràl lehlama Tuklo perh thla thei te pawh kan awm thin deuh lo maw!
Sum leh pai neih ang ang nen neihthinglung khâwngin theih tawp kan chhuah a. Hahni dài reh hman miah lova Istiri chhe zâwk hawn ang huauva nui reng maiin kan lêng kual a, kan tang thin a ni. Kan han tling ta a le, thâwm a thain chhuat pui taha ui thum tlân ang ham hamin kan ri ham ham ta thin a. Zoram mipui hei zozai tâna râl hmatâwng tur, khawpui laili ber atanga michhe vêng kêltil thlenga min enkawl tur, an kova thil rit tak phur tur ni si, an hlim em em zel mai te hi lawmawm tak phei chu a ni.
Tun tum inthlan huna tling tur zawng zawngte, pâ an tlo leh in a tlo ngai e; kan Mizo thufingah pawh, ‘Mi âwkhrâwl an hlawhtling thei, mahse an tlu thut thei’ tih a nih kha. Lei dàia kan ruh leh tisâ a luan ral hnuah leh, suanglungpuia kan sakhming ziak a chul hunah meuh pawh, mi duhâm leh âwkhrâwlte thlah zawngin, zah an kâi ngai dawn hauh lo a nia. Kan tu leh fate khawvel tur kan duannaah hian kan hming an la rawn sawi chhiat a, min rawn dem a, kan thlânlungah chil mi la pik khum mai loh na’n, kan vawiin hi an vawiin a nih hun a la awm ve dawn tih hre tlat chungin ram leh hnam enkawl ang u aw. Mi û te kan ûm phâk lo’ng e, tang fan fan!