Inthlanpui kaihhnawiha vohbikte hma khua ngaihtuahtuten ruahmanna siam

Inthlanpui kaihhnawiha vohbikte hma
khua ngaihtuahtuten ruahmanna siam
Inthlanpui kaihhnawiha vohbikte (Person’s with Disability – PwD) hmakhua ngaihtuaha ruahmanna siamtu tur State Steering Committee on Accessible Elections (SSCAE) chu Inrinni khan an thukhawm a. Inthlanpui hnuhnung pahnih – 2023 MLA inthlan leh 2024 Lok Sabha inthlana an tana ruahhmanna siam thlirletin, an harsatna tawh sawiho a ni.
SSCAE hi Election Commission of India thupek angin PwD-te awlsam zawka inthlanpui leh a kaihhnawih hmalakna hrang hrangah kim taka an tel theih dan ngaihtuah tura din a ni a. Tun tuma Mizoram chief electoral officer Dr Lalrozama kaihhruaia thutkkhawmah hian PwD kum tling tawh electoral roll-a la chuang lote zawn chhuah tumin ruahman a ni. Hemi atan hian district tina Election department hnuaia din District Monitoring Committee on Accessible Election (DMCAE) chu District Level Disability Committee nen thawk dunin hma la tura tih an ni.
Electoral roll buatsaihnaah leh inthlan kaihhnawih hrang hrangah PwD puala hmalakna kawngah thawhpui turin district tinah PwD Icon ruat tura rel a ni a. Inthlan buaipuituten PwD-te mamawh an hriata an lo dawnsawn thiam zawknan training mumal taka neih thin tura tih a ni.
PwD-ten harsatna nei loa vote an thlak theihnan polling station atana hman building hrang hrangah wheelchair kaltheihna, tuithianghlim in tur, inthiarna mumal leh chawlh hahdamna tur remchang a awm vek dan a ranglama ngaihtuah tura tih a ni a. Polling station panna kawng tha leh PwD-te vote thlak tura an kalin lirthei an dahna tur mumal tak ngaihtuah nise tih a ni bawk.