Intiamna avangin Kolasib district-a kawng dan titawp

Kolasib district-a kawngpui chhia in harsatna a siamsak nasat avanga lirtheia eizawngtuten siamthat thuai phutna atana tiamchin awm loa national highway kawngpui an dan mek chu sawrkar leh kawng siamtuten siamtha rang tura ziaka an intiam avangin Zirtawpni, August 23 chawhnu dar 2.00 khan an titawp.
Kolasib district-a lirtheia eizawngtu pawl 5 intelkhawm chuan kawng chhia siamthat thuai phut hian August 22 chawhma dar 10.00 atang khan Bairabi leh Vairengte atanga Kolasib – Kawnpui kawng, NH 306/06 an dang tan a. Lirthei eng chi mah a tlantlang lo.
Zirtawpni khan Kolasib bawrhsap Robert C Lalhmangaiha kaihhruaiin Kolasib District Truck Owner Association (KDTOA) leh Kolasib District Driver Welfare Coordination Committee ten kawng tha zawk beiseia NH 306/06 an dah mek leh kawngpui tha zawk nei tura thawhhona tha neih dan tur an sawiho a. Kawng dan mek chu an thil phut tih hlawhtlin a nih chuan tihtawp an inhuam tih an sawi a. Sawiho a nih hnu leh an thil phut hi official lamin theihtawp chhuahpui an intiam angin, inremna thuthlung an ziak ta a ni.
Bawrhsap chuan tun dinhmunah kawng chu thuang hniha kalpui nise, ruahsur lai a nih avangin a khuar zual hnawhah insawrbing hmasak a, working season-a blacktopping a nih hnu pawhin a huhoa thahnemngai taka vil tlan a ngai tih a sawi a ni. Helai kawng chungchanga chak zawka hma la turin SDO (Sadar) kaihhruaina hnuaiah Working Group din a ni a, a rang thei ang berin NHIDCL leh MPWD contractor-te nen sawikhawm tum a ni tih a sawi bawk.
NHIDCL-in an hnuaia contractor-te hnenah August 21 khan hriattirna pe in, October 5. 2024 hma in kawng khuar zual lai hnawh vek turin an ti a. MPWD pawhin Sadguru hnenah hriattirna an pe ve bawk tih bawrhsap hian a sawi a ni.
Thutkhawm zawh hian bawrhsap hoin kawng siam lai mek a hmunah an enfiah a ni.
Intiamna anga tihhlawhtlin tura phut:
* Kolasib district huamchhunga Mizoram chak lakna kawngpui, PWD National Highway Division-III enkawl, Bairabi – Zero Point, Bilkhawthlir – Kolasib leh Kawnpui – Khamrang hi 2024 August 23 atanga thla khat chhungin kawngpui khuar lai hnawha pangngai taka kal theih turin an siamfel hman tur a ni.
* Kolasib district huamchhunga Mizoram chak lakna kawngpui, NHIDCL enkawl Sethawn RTP Workshop kawng chhe lai leh Kawnpui quarry kawng chhe lai hi an intiam tawh angin 2023 August 23 atanga ni 15 chhungin lirthei eng chi pawhin huam taka an zawh theihin an siamfel hman tur a ni.
Heng point pahnih hi Kolasib district bawrhsap-in tihlawhtling ngei turin theihtawp chhuahin hma a la zui ang.