Intlanchhawk dan tharah lirthei chhuak a tam, traffic jam nileng

Intlanchhawk dan tharah lirthei
chhuak a tam, traffic jam nileng
Aizawl khawpui kawng dunga lirthei intlanchhawk dan thar hman mekah lirthei an chhuak tam a, traffic jam a a tih zual phah deuh nia hriat a ni.
August thla chhunga enchhin tum lirthei intlanchhawk dan tharah hian taxi (four wheeler leh two wheeler) chu kar khat chhunga an tlan loh hun chhung tih tlem sak an ni a, hei vang hian nitin 700-800 inkar velin a hma aiin service an pun belh nia ngaih a ni. Private lirthei a pung zel bawk nen, khawpui kawng dung, a bikin Sikulpuikawn leh Chanmari inkarah lirthei chevel a tam a, nileng deuh thaw in traffic a kaltluang lo nia thu dawn a ni.
The Aizawl Post-in a zawhnaah taxi neitute lam chuan, four wheeler bik hi 200-250 velin ni khata service thei an pun belh a, two wheeler taxi hi 500 velin an pun belh bawk niin an sawi. Chutihrualin private/ sawrkar lirthei a tam hrim hrim a, heng lirthei inkara an inzeh dan enin anmahni chu traffic ti jam-tua puh theih an ni bik lo tih an sawi.
Hetihlai hian Aizawl two wheeler taxi hi a rawng inang, a var leh eng hmang turin State Transport Authority chuan a lo tih tawh a. Aizawl Two-wheeler Taxi Association chuan ti rih lo tura an ngen angin STA hian hun engemawchen a ti khawtlai leh a, tunah August 18 hmaa a rawng hi thlak vek tawh turin hriattirna a tichhuak thar.
Association lam hian rawng thlak lo an la awm avangin September thleng hrethiam turin STA an dil a, STA hian ziakin order tihchhuah a la nei lo thung nia thu dawn a ni.