Invihna thleng nia sawiah Thudik lo a darh tih finfiah

Invihna thleng nia sawiah
Thudik lo a darh tih finfiah
Tunhnaia social media lama invihna thleng ni awmah sawiah thu diklo a darh a, raltlan kut tuar ni awma ngaih theiha sawi chu a dik lo ve ve tih finfiah a ni.
Mizoram Police hotute sawi danin, April 3 zing dar 9.10 khan Aizawl Police Station chuan Zion Street bula invih chungchang hi an dawng a. Rang tanga bawhzui nghalin, a hmunah hian mi vittu nia sawi Zoramsanga (39), Hunthar Veng chu man a ni.
Police hnena a sawi danin, hemi zing dar 9.00 vel khan a thianpa Lalchhuanmawia (28), Bethlehem Vengthlang Aizawl nen an inhnial buai a, a thianpa hian a thil zawrh lai – thei a paih darh sak a ni. Nidangah pawh tawngkam dengkhawng deuhin a lo chhaih thin a, hemi tuma a thil zawrh a tih darh sak hian, a thinrim thut chuan chem (pencil/ horse knife) a ken lai chuan a vit ta mai niin a insawi.
Vih tuartu hi Civil Hospital Casualty-a enkawl a nih hnu ah chhuahtir leh nghal a ni. Thil zuar dun thin, nitin inkawp reng an nih avangin thubuai thehluh an duh loa, chutihlaiin kut thlaktu Zoramsanga hi zu a ruih avangin breath analyzer hmangin a ruih dan chin endik a ni a, a ‘inham tlin’ avangin hemi hmang hian thubuai siamsak a ni thung.
April 6 zing dar 4.00 vel khan Dawrpui Veng Aizawl Watch House bulah mi 6 velin tibuai a, chemtea vit nia police-te hnena insawi Lalvenpuia (26) s/o Lalrinchhana Keitum, Serchhip district, tuna Tuikhuahtlanga cheng mek chu, cctv atangin leh amah thu zawhfiah a nih hnu, thil awm dan hriatchian a nih hnu ah thudik lo a sawi tih hriat a ni a. Chemte-a vih niloin, bike-a amaha chesual, a chhungte hauh hlauh vanga thu phuahchawp a ni tih finfiah a ni.