IPRO-ten inthlan kaihhnawih zir

MLA inthlanpui neih tur pualin Information & Public Relations officer-te tan Zirtawpni khan Aizawlah an hriat tur tul inzirtir a ni a. Inthlanpui tluang taka neih a nih theih nan media kaihhnawih thil hrang hrang zir a ni.
Addl. chief electoral officer H. Lianzela chuan mipuiin an aiawha rorel tur an thlan theihna chu democracy lungphum pawimawh tak a ni, tiin, inthlan langtlang leh thianghlim tak neih a nih theih nan India danpui chuan Election Commission of India (ECI) chu zalenna leh thuneihna zau tak a pe tih a sawi. ECI-in media-te a khuahkhirh loh rualin, dan leh thupek an zawm a ngaipawimawh tih a sawi a. Mipui hrilhhriat leh tan bik nei loa thu thehdarh chu sawrkar thupuangtute mawhphurhna pawimawh tak a ni, tiin, inthlan kaihhnawih dan hrang hrang a sawi a ni.
Vote thlak a tam theih nan tan la theuh tura ngenin, Systematic Voters’ Education and Electoral Participation (SVEEP) hmalakna theihtawp chhuahpui turin a sawm a. MLA inthlan turah polling station zaa 50 inthlan kalpui dan (election process) official-ten an lo enfiah theih nan ‘web-casting’ tih a nih dawn thu a sawi bawk.
Training-ah hian Mizoram district 11-a IPRO te an tel a. State level master trainer Dorothy Muansangi, Victor Lalawmpuia leh Zoramdini inthlan kaihhnawih an zirtir a ni.