Iran-a Indian pathum ruk bo chhanchhuak

Iran-a Indian pathum ruk bo chhanchhuak
Thla hmasaa Iran-a zin Indian pathum ruk bote chu Tehran police-in an chhanchhuak tih Thawhlehni khan thuneituten an sawi.
Punjab mi vek, Amritpal Singh, Hoshiarpur; Jaspal Singh, Shaheed Bhagat Singh Nagar leh Hushanpreet Singh, Sangrur te hi May 1-a Iran-a travel agency kaltlanga zin chhuak, Australia-a hna thawka kal tur an ni a. Tehran an thlen hnu lawk hian ruk bo an ni a, an chhungte hnenah ru botute hian India-a haw leh tur chuan tlanna sum an phut zui.
India-a Iranian Embassy chuan an zavai hian chhanchhuah an ni tih X-ah tar langin police-in Tehram chhim lama Varamin khuaa beihpui an thlaknaah an chhanchhuak tih an sawi a. Iranian foreign affairs ministry-a consular affairs department chuan tual chhung police nen an bei ho tih a sawi.
Ruk bo chhungte hian thalai mipa pathumte hi tlanna sum an phut thu Indian thuneitute an lo hrilh tawh a. Jaspal Singh-a unaupa, Balwinder Singh-a chuan a tirah Rs vaibelchhe 1 an phut a, a hnuah Rs. nuai 18-ah an tla thla tih a sawi a. Ministry of External Affairs (MEA) chuan Iranian thuneitute dawrin chhui leh chhan chhuah tumin an bei ta ngar ngar a ni.
MEA thupuangtu, Randhir Jaiswal-a chuan May 29 khan, “Iranian thuneitute nen ni tin kan inbia a, an chhungte pawh puihna awm theia puih kan inhuam reng thu kan hrilh a. Iran-a thawktute nen thawhhona tha tak kan nei a ni,” tiin a sawi.
Iran-a Indian Embassy pawhin ruk bote hi him taka an chhuah leh theih nan theihtawp an chhuah tih an sawi a, an chhungte pawh an bepawp reng tih an puang bawk.
Chhanchhuah an nih takah hian an chhungte pawh an hlim hle a. Amritpal Singh-a hian a patea, Gurdev Singh-a chu police phone-a biain chhanchhuah an nih thu leh damdawi thiamten an endik mek thu a hrilh a. A rutute hi man nghal an ni tih a sawi bawk.
Jaspal Singh-a nupui, Kuldeep Kaur-i pawhin a lawm hle tih sawiin Indian sorkarin tha taka hna a thawh avangin lawm thu a hrilh a. “Thla khat liam ta chhung kha chu mangchhia a ni ringawt a. A aw kan hriat hnuhnung ber chu tlanna sum pe tura video call-a kan inbiak chauh kha a ni tawh,” a ti.
Sangrur-ah Hushanpreet Singh-a nu, Balwinder Kaur-i chuan a fapa chhanchhuah a nih thu hi chanchin tharah a hria tih a sawi a. A patea, Ramesh Sharma-a chu Hushanpreet-a hian a be bawk a. “Ru botute hi an zavaiin Pakistani an ni a, man nghal vek an ni,” a ti.
Indian sorkar chet lakna chu fakin Prime Minister Narendra Modi leh External Affairs Minister S Jaishankar hnenah inrawlh tura ngenna email a thawn hman tih a sawi bawk.