Iran hnuah India-in Israel-a a mite hruai haw hna tan dawn

Iran hnuah India-in Israel-a a mite hruai haw hna tan dawn
India chuan Middle East-a ram hnih indo meka a pakhat zawk, Iran atanga a mi awmte a thiar chhuah tan mek laiin Israel atang pawhin thiar chhuah beihpui a thlak veleh dawn.
Ningania thu a chhuahah sorkar chuan Operation Sindhu a kalpui mekah Israel-a a khua leh tui awmte chu India hian lirthei hmangin ramri-ah kalpui phawtin, heta tang hian thlawhnain a hawpui dawn a ni.
Tel Aviv-a Indian Embassy chuan Indian-te hruai haw dan tur hi ruahmanna a siam.
Embassy hian thiar chhuah hna kalpui tur hian Indian zawng zawngte chu Tel Aviv-a an hmunpuiah inziak lut vek turin a ti a. Eng emaw zawhna nei leh harsatna nei tan biakpawhna tur telephone number leh email id a tichhuak bawk.
A hmain embassy hian Israel-a Indian awmte chu inralringa Israeli thuneitute leh Home Front Command-in himna tura tih tur leh kaihhruaina a tihchhuahte chu zawm turin an lo ngen tawh.
Indian sorkarin Israel atanga a mite hruai chhuah hna a thawh dawn thu a puan hma lawk hian Iran-a Indian awm a hawpui hmasak berte chu Delhi thlenpui an ni.
Iran-a Indian awmte hruai haw tur hian an thenawm, Armenia ramri phurh thlena ramri kânpui an ni a, heta tang hian thlawhnaa lak chhuah an ni a. A hmasa berah hian mi 110 phurh haw niin an zavaiin zirlai an ni.
Kar kal ta Zirtawpni atang khan Israel leh Iran hi missile leh drone hmangin an la inbe zel a. Nilaini pawh khan Israeli Air Force chuan Iranian ram chhunga nuclear sawngbawlna, missile siamna hmun leh an air defence system-te a kah chhunzawm leh a. Tehran, Isfahan, Shiraz leh Kermanshah khawpuite a bitum deuh bik.
Israel sipaite chuan Natanz bula Arak heavy water reactor leh nuclear ralthuam siamna tura hmun an hmante an kap chhia niin an insawi a. A hmain thlawhna hmanga an beihnaa Iranian sipaia hotu lawk leh nuclear scientist-te thatin an nuclear hmun hrang hrang an lo kap chhe tawh bawk.