Iran-in beih leta a vau karah US-in Middle East-a a mite hruai haw

Iran-in beih leta a vau karah US-in Middle East-a a mite hruai haw
Iranian thuneituin Washington-in a kah chuan Tehran pawhin American awmhmunte a bei ve nghal dawn tia a vau mek laiin US chuan Middle East-a a mite a hruai haw mek niin thuneituin a sawi.
Iran-a an hruaitute chuan Islamic Republic an din hnua nawrna na ber tawng mekin Tehran chuan US President Donald Trump-a’n sorkar duh lotute kaihhnawiha a vauna chu a chhang zel bawk.
US thuneitu sang, a hming sawi lan duh loh chuan boruak sosang zel karah US hian an awmhmun pawimawha an mite thenkhat chu a hruai haw tih a sawi.
European thuneitu sang pahnih chuan Iran-ah hian US an chet ngai a rinawm hle nia sawiin pakhat phei chuan darkar 24 chhung (Ningani zan thleng)-a an chet hial a ring a. Israeli thuneitu pakhat pawhin Trump-a hian inrawlh turin thu a titlu tawh niin a sawi a, a hun leh engtia chet tur nge tih erawh a la chiang lo tih a sawi.
Qatar pawhin Middle East-a US awmhmun lian ber, Al Udeid air base pawh an inring hle niin an sawi.
Iran-ah hian mipuiten puithiam rorelna duh lohna nasa takin an lantir a, a hmeh mih tuma sorkarin a beihnaah mi sang chuang thah an ni tawh nia sawi a ni a. Hetiang karah hian Trump-a chuan mi an thah chuan beihah a vau reng bawk.
Iran-a mipui lungawi lohna hi chawlhkar hnih liam taa intan kha niin an eibar dinhmun chhe lutuk leh an pawisa hlutna tlahniam lutuk nghawng chhuah a ni a, 1979 Islamic Revolution-a puithiam rorelna an hman tan atanga a nasat ber tum a ni.
Iranian thuneitu chuan mi 2,000 chuang an thi tawh niin a sawi a, mihring dikna chanvo humhalhtuten 2,600 chuang an ti thung.
Armed Forces Chief of Staff Abdolrahim Mousavi-a chuan Iran hian ‘tun ang reng renga thil chhiatna nasa’ an la tawng ngai lo tih sawiin ram dang hmelmate tihah a puh.
Iranian thuneitute hian buaina an tawh hi US leh Israel fuihpawrha chhuak niin an sawi a, mipui, ‘ralthuam keng firfiak’ tia an sawite an hmang niin an sawi.
Trump-a hian Iran-ah hian a inrawlh tur thu a sawi chamchi a, a chet dan tur tak a sawi ngai lo va. Thawhlehnia CBS News-in an kawmnaah chuan Iran-in lungawi lote a tihlum a nih chuan ‘na takin’ a che dawn tih a sawi a. Iranian-te chu an lungawi loh lantir nasa taka kalpui tur leh ‘puihna tur a lo kal mek’ tiin a chah bawk.
Iranian thuneitu sang pakhat, a hming sawi lang duh loh chuan Tehran hian an chhehvela US thian thate chu Washington-in a beih mai theihna dang turin an dawr niin a sawi a. US-in a beih phawt chuan ‘Tehran hian a thenawm, Saudi Arabia leh UAE atanga Turkey thlengin, heng rama US hmunte chu beih a ni ve dawn tih a hrilh’ tih a sawi.
Iranian Foreign Minister Abbas Araqchi leh US Special Envoy Steve Witkoff te inbe tura tih chu thulh rih a ni tih a sawi bawk.
US hian Central Command hnuaiah Qatar-a Al Udeid leh US Navy-a Fifth Fleet-in Bahrain-ah sipai an dah.
Iran-ah hian internet tihthih a nih avangin eng nge thleng hriat a harsa hle a. US-a HRANA rights group chuan mi 2,403 thah an ni tawh niin an sawi a. Mi 18,137 man an ni tawh bawk niin an sawi.