Syrian capital Damascus-a a consulate beih phuba lain Iran chuan drone leh missile hmangin Israel a bei zui.
Israel chuan tun thlengin Iran consulate a beih leh beih loh a la sawi chiang duh miah lo thung a, mahse, a bei ni ngeia ngaih a ni.
Tun hi Iran-in direct a Israel a beih hmasak ber a ni bawk a. A hma chuan Israel leh Iran te chuan an tih a nih sawi chuang si lovin an rotling leh hmun pawimawh te an inbeihsak fo thung.
Gaza-a indona chhuah hnuah inbeihna a nasa tial tial a, Palestinian militant group lian ber ber te chu Iran thuhnuaia awm leh a chawm te an ni.
-- Advertisement --
Eng vangin nge Israel leh Iran hmelma an nih?
Ram pahnih te hi kum 1979 Islamic Revolution hma zawng chuan inkawmngeih allies an ni a, mahse, Islamic Revolution thlen hnuah an ideology kalpui chuan Israel chu a hnawl bur a ni.
Iran chuan Israel ram chu pawm duh lovin nuai bo tur a ti zui bawk a. Iran supreme leader Ayatollah Ali Khamenei chuan a hma pawhin Israel chu ‘cancer tumour’ tia sawiin ‘a zung nen chawpa phawia tihchhiat tur’ a ti bawk.
Israel chuan Tehran thusawi duh dan chu a ram hnawl bur tiin hlauhawmah a ngai bawk a. Iran chuan Israel tihchhiat a nih theih nan proxy forces te dinin leh chung mite chu sum leh pai leh ralthuam te pein a chawm bawk a. Hamas te Lebanese a Shia militant group Hezbollah te chu Iran proxy te vek an ni.
Iran-in a consulate beih phuba lak duh
Iran chuan kar kalta Inrinni khan Israel a beihna chu April 1 a Syrian capital Damascus-a a consulate beihna chhanletna a ni tiin a sawi a. Kha thil thlengah khan Iranian senior commander pahnih te chu nunna chan zingah an tel.
Iran chuan Israel tih ngei tia sawiin chu chu sovereignty bawhchhiatna a ti bawk a. Mahse, Israel chuan a tih a nih leh nih loh a sawi duh miah lo va, mahse, a tih ni ngeia ngaih a ni thung.
Consulate beihnaah khan mi sawm pathum in nunna an chan a. Nunna chan zingah Brig Gen Mohammad Reza Zahedi, senior commander, Quds force Iran sipai tha Republican Guards (IRGC) overseas branch hotu lawk chu a tel a. Zahedi chu Lebanese Shia armed group Hezbollah te enkawl ber tu a ni bawk.
Consulate beih a nih hnu hian Iranian target te chu airstrike hmanga beih zui a ni bawk a, chungte chu Israel tih ni ngeia ngaih a ni a. Tun hnaia Syria a air strike kalpuiah IRGC commander eng emawzahin nunna an chan phah tawh a ni.
IRGC te hian arms leh equipment, high precision missiles te chu Syria kaltlangin Hezbollah te hnenah a pe thin a ni. Chu tak chu Israel chuan tihtawp a tum a ni a, chu mai bakah Syria-a Iran inbun nghet chu dan a tum a ni bawk.
Iran allies te?
Iran chuan Middle East-ah allies leh proxy forces network tha tak a siam a, chungte chu US leh Israel interest do let nanaa ‘axis of resistance’ tia a sawi huam chhunga mi vek a ni.
Syria chu Iran ally pawimawh ber a ni a. Iran mai bakah Russia pawh telin Syria civil war ah Syrian sorkar Bashar al-Assad kaihhruai chu an dinchantir a ni.
Lebanon-a Hezbollah te chu Iran thlawp amred group lian leh thil tithei ber an ni a. Nikum October thlaa Israel leh Hamas tena indona an kalpui atang khan ni tin deuhthaw Israel leh Hezbollah te chu an inkap a. Ramri lehlam lehlamah mi sing telin an chenna in an chhuahsan phah tawh bawk.
Iran chuan Iraq-ah Shia militia tam tak a thlawp bawk a, chung pawl te chuan Iraq, Syria leh Jordan a US base te chu rocket hmang te in an bei chamchi bawk. Tun hnai lawkah pawh Jordan a US military outpost chuan beih tawkin US sipai pathumin nunna an chan phah a ni.
Yemen-ah pawh Iran chuan houthi movemnet a thlawp a, Houthi te chuan an ram mipui tam ber berna te chu an thuhnuaiah an dah tawh a. Gaza-a Hamas te an thlawpzia lantir nan Houhti te chuan an tuipui kam hnaiha commercial shipping te beiin Israel chu missiles leh drones te hmangin an bei fo bawk a. US leh UK te chuan Houthi target te an bei bawk.
Iran chuan Palestinian armed group Hamas te chu ralthuam mai bakah training a pek reng an ni bawk a. Tuna Gaza buaina pawh hian Middle East zau zawk a tuam hlauhna a lian hle.
Iran leh Israel military lama an theihna?
Ram ang zawng chuan Iran chu Israel aia lian fe niin mipui 90 million vel a nei a, Israel aiin a let sawm vela lian a ni a. Mahse, chu chuan military power a nei turu zawk a tihngawt theih loh.
Iran chuan missile leh drone lamah investment nasa takin a ti a. Ralthuam tam tak a nei bawk a, tichung chuan a proxie ho Yemen a Houthis leh Lebanon a Hezbollah te chu ralthuam tam tak a pe bawk.
A tlakchham erawh modern air defence system leh fighter jet te a ni thung. Russia chuan Ukraine nena indona kalpui mekah Tehran in military support a pek avangin a pui let dawn tia sawi a ni a. Tehran chuan Russia hnenah hian Shahed attack drone thahnem tak a pe a ni.
Israel erawh khawvel huap pawhin air forces lama turu ber pawl ram a ni. IISS military balance report chuan Israel chuan Jet squadron pawh 14 lai a nei a, chung zingah chuan F-15, F-16 leh F-35 stealth jet te pawh a nei a ti. Chu mai bakah Israel chuan a hmelma ram ril tak beih lamah pawh tawnhriat a nei tha bawk.
Iran leh Israel hian nuclear weapon an nei em?
Israel chuan nuclear weapon a nei ngeia ngaih a ni a, mahse, official-a a dinna chu ngawih chuh a ni bur thung.
Iran chuan nuclear weapons a nei lo va, civilian nuclear programme te nuclear armed state a nih theih nana remchanga hman a tum tia puhna a hnawl bawk.
Nikum khan global nuclear watchdog te chuan Iran-in uranium a thlitfim chu 83.9% purity niin chu chu weapon grade a teuh hle tiin an sawi a.
Iran hian a hma zawng chuan kum 2015 nuclear deal kalhin uranium 60% purity a thlitfim dan a thiam hman a ni.
Israel a beih hmanga Iran-in message a pekchhuah?
“Kan dang a, kan kap thla a. |angrualin kan chak ang” tih chu Israeli Prime Minister Benjamin Netanyahu an Iran beihna chungchang a sawi dan a ni.
UK prime minister thahnem tak te foreignpolicy adviser leh Lebanon-a UK ambassador pawh ni tawh Tom Fletcher chuan Iran chet dan chu a theihna lantir tumna a ni a ti.
Iran leh Israel hruaitute chu an ram chhungah ve ve pressure nei an ni a, khawvel sawisel an ni bawk a, chuvangin na taka chetlak an hreh dawn lo a ti bawk.
Iran tum ber chu theihna a neihzia lantir niin boruak sosang zel se erawh a duh lovang a ti bawk a. Iranian te ngaihdan chuan Hezbollah te hmang lova Iran-in direct a a beihna chu an lawm tia sawi a ni bawk.