Iran-in FIFA World Cup khelh theih hmel loh!

Iran-in FIFA World Cup khelh theih hmel loh!
Tunhnaia United States president Donald Trump leh Fifa president Gianni Infantino inkawmin Iran World Cup football team chungchang an sawidun hnu lawk Nilaini khan Iran sports minister Ahmad Donyamali chuan tun ang indo boruakah an ram football team tan US a thlengtu pakhat an nihna kumin Fifa World Cup-ah an tan chhuah ngaihna a awm lo tih a sawi chiang.
Asian qualifying third round-a Group A sangber ni chungin nikum khan Iran hi team 48 inelna tur FIFA World Cup 2026 khel turin an tling a, a zawna World Cup tournament vawi li an khelhna tur a nih laiin US, Canada leh Mexico-te inthlentawm tur kan hma lawk Fifa tournament-ah an inlan theih a beiseiawm ta lo hle a, US leh Israel tangdunin Iran rama sawrkarna chelh mek hi an hnukthla thuai a nih loh chuan Asia khawmualpui ranking-a top kumhlun team hi kan hmu lo takngial dawn niin a lang!
Fixture tarchhuah tawhah chuan June ni 11 atanga July ni 19 chhung awh tur tournament-ah Iran hi US leilunga game thum khel phawt tur an ni a, mahse, US leh Israel inthurual chuan Islam kal firfiak sawrkar hi bomb hmangin an chhu mek a, Islamic Republic Supreme Leader Ayatollah Ali ‌Khamenei telin an hruaitu lawk leh sipai lal thahnem tak an thahsak tawh chung pawhin Iran hi an la tlawm mai duh bik lo!
He Islam sawrkar hi thlawhna leh missile ringawt hmang chuan an pawt tlu zo mai dawnin a lang lo a, president Trump ngeiin an rama Iran team inkhel tur a welcome thu sawi eng ang mah se a tirtu tur an ram sawrkar berin an World Cup team an tirhchhuah duh loh chuan Iran tel lo World Cup a ni ve thei tlat!
An ram minister chuan state television kaltlangin an hawi lam tur a sawi chiang a, “He corrupt sawrkar hian kan hruaitu min thahsak miau a, eng dan hnuaiah mah he World Cup-a kan tel ve hi a thiang dawn lo,” a ti bur!
Donyamali chuan sawizawmin, “Kan naupangte dinhmun bulthum a him lo a, chuti ang kara lo tel ve chu thil thiang pawh va ni suh.
“Iran laka natna thlen tura an chet dan hi en ula, tunhnai thla riat thla kaw chhungin kan lakah tum hnih ngawt indo an puang ta a, kan mite sang chuang thatin, martar-na khur ruamah min hnuklut lui a, chuvangin, keini tan ring han rawlh ve na chi zia zang a ni lo e,” a ti.
UN-a Iran ambassador Amir Saeid Iravani tarlan danin, kumin February ni 28 atanga US leh Israeli airstrike an tan atang khan Iranian civil mi 1,300 chuang an thi tawh a, Inran sawrkar hi a tlawm mai lo a nih phei chuan thi zat hi an la pun belh zel dawn a ni.
Fixture-a a lan danin, Iran hi Group G-ah Belgium, Egypt leh New Zealand-te nen awm hoin, an match pahnih hi US khawpui lian Los ​Angeles-a khelh tur niin, group match khat dang chu Seattle-a khelh tur a ni thung.
Hetih lai hian an ram sawrkar chuan US leilunga an World Cup team tirh a tum lo a, karliamta maia Atlanta khawpuia World Cup khel tur ramte inhmuhkhawm tum FIFA planning summit-ah pawh khan tel lo ram awmchhun an ni.
An ram sports minister thusawi hriat tur a awm hnu hian Iranian Football Federation leh FIFA lam atangin chhanna emaw sawifiahna thu hriat tur he thu buatsaih lai thleng hian a la awm lo.
FIFA dan ding laiah chuan World Cup atanga inhnukdawk ram chu match hmasaber khelh hma ni 30 la awm aia tlai loah Swiss franc 250,000 (USD 320,800) an chawi tur tih a ni a, sum chawi tur zat tarlan hi a tlem thei ang ber a ni a, hei aia tam pawh hi chawitir theih a ni.