Iran-in Israel vauna chhakchhuak

Iran chuan Israel in Lebanon a bei a nih chuan Iran leh a regional allies “Resistance Fronts” tin te chuan Israel lakah indo an puang ang tiin a sawi.
Israel leh Lebanon a inbun Iran thlawp Hezbollah movement te chu nitin deuhthaw inkap rengin an awm mek a, hei vang hian regional war chhuakin indona nasa zawk a thlen hlauhna a lian hle a ni.
June thla khan Israel leh Hezbollah te inebihna chu nasa zualin tawngkaa invauna mai bakah ralthuam hmanga inbeihna a thleng zing hle a ni. Israel sipaite chuan Lebanon a inbun Hezbollah te beih dan tur ruahmanna an pawmfel tawh a ti bawk a. Hei hi chhang letin Hezbollah te chuan Israel in a bei a nih chuan buaina nasa zawk a chhuak ang a ti bawk.
Social media platform X ah Iranian mission chuan thuchhuah a siamah ‘Lebanon bei dawn anga insawi hi Zionist te psychological warfare a ni’ a ti a. Mahse, “Full-scale military aggression a kalpui lui a nih ngat chuan indona nasa zawkin a zui ang a. Resistance Fronts zawng zawng te pawh an inrawlh vek thei a ni,” tiin a tarlang bawk.
Nikum October thla khan Gaza indona a chhuak a, Hamas Palestinian militants tena 7 October a southern Israel runa mi 1,200 chuang tihluma mi 500 vel mitang an hren atanga intan a ni.
Hamas-te hi Iran thlawp an ni a, Hamas te chetlakna chu Iran chuan fak zuiin mahse inhnamhnawihna a nei ve lo a ti thung.
Gaza indo laiin northern Israel lamah Hezbollah te chuan chet an lo la ve reng bawk a, heng mai bakah hian Iran thlawp tho Yemen a Houthis rebel te chuan Palestinians te an thlawpzia lantir nan Red Sea a commercial lawng te an bei chamchi bawk.
Iran hian kum 1979 a Iran sorkar United States thlawp revolution hmanga an nawrthlak hnuah Israel chu ram angin a pawm duh lo a ni.
Kumin kumtir lam khan Israel leh Iran indona a chhuah mai hlauhna a lian hman hle a. April thla khan Damascus-a Iran consulate chu Israel-in air strike hmanga beiin Iran Revolutional Guards pasarihin nunna an chan a, pahnih phei chu sipai general an ni. Iran thinrim chuan April 13-14 khan missile leh drone hmangin phuba lak nan Israel a bei zui a ni.