Iran supreme leader-in nuclear inbiaknaa US rawtna sawisel

Iran supreme leader-in nuclear
inbiaknaa US rawtna sawisel
Iran-a Supreme Leader Ayatollah Ali Khamenei chuan nuclear-a inremna an neihna atana rawtna a siam chu sawiselin uranium chhek a titawp dawn chuang lo tih a sawi.
Iranian aiawha indawrnaa telte chuan White House-in Inrinni kal taa inbiaknaa rawtna ‘kimchang leh pawm theih tur’ an pharh chu an la chhang ve dawn.
US chuan rawtna a thlenah hian Iran-in nuclear ralthuam atana hman theih uranium a chhek tihtawpna tur a tel a tih an sawi.
Supreme leader a nih angin Khamenei-a hian an ram tana thil pawimawh ber pakhat, nuclear inremna an neih theihna tur ni bawkah a ngaihdan a sawi a ni.
Islamic Republic dintu, Ayatollah Ruhollah Khomeini-a thih chama thu a sawiah hian a lo aupui tawh thin, ‘Kan ti thei’ tih ngaihdan dona 100% a nih thu a sawi.
“Uranium siam hi kan nuclear programme-a a pawimawh ber a ni a, hmelmate hian chu chu an er ber a ni,” a ti.
“America hruaitu luhluh tak takte hian nuclear programme kan neih an phal lo va. Tu nge Iran-in uranium chhek turin ti reng reng?” a ti.
Khamenei-a’n hetianga a sawi hma ni khan US President Donald Trump-a chuan Iran hian uranium a sawngbawl a tihtawp vek ngei tur thu a sawi.
Trump-a hian an inbiaknain rah tha a chhuah lo a nih chuan Iran hi US leh Israeli sipaiten an bei mai dawn niin a vau bawk.
Kum 2015-a khawvel ram thiltithei parukte nen inremna an neihah Iran hian nuclear a sawngbawlah tiamchin a nei a, ram lianten an hrekna an tinep ve thung a. He inremna hnuaiah hian uranium chu 3.67% chin bak a tithianghlim thiang lo va, hei hi sumdawnna atan, nuclear power plant-a a tui atana hman theih chin a ni.
Trump-a hian president a nih hmasak, kum 2018 khan he inremna atang hian chhuakin bomb an siam lohna tura danna nep lutukah a puh a, eibara Iran an hrekna an kalpui thar leh.
Iran hian nuclear a buaipui dan chu a him chin vek a nih thu leh nuclear ralthuam neih tumna engmah a thleng lo niin a sawi a. Hrekna a tawrh thar leh avangin inremna piah lamin a che zauh zauh thung.
International Atomic Energy Agency (IAEA)-in kar hmasaa report a siamah pawh uranium kg 408 chuang kawlin hengte hi 60%-a thianghlim an ni hlawm niin tar lang a ni a. Hei aia tihthianghlim leh hret chuan nuclear bomb pakua siam theihna daih niin an sawi a ni.