Iranian hotuin US nena nuclear-a indawrin remna a thlen ring lo

Iranian hotuin US nena nuclear-a indawrin remna a thlen ring lo
Iran-a Supreme Leader chuan US nena nuclear chungchanga inbiakna an neih chuan inremna thar a hrin chhuah a rinawm chiah lo niin a sawi a, an lakah uranium enkawl danah ‘phut sang uchuak tak’ an nei niin a sawi.
“Keini chuan thil a hrin chhuah kan ring lem lo va, eng nge lo thleng dawn erawh kan hre bik lo,” tiin Ayatollah Ali Khamenei-a chuan a sawi.
Oman-in palai hna a thawh zara April 12 atanga thawh li an inbiak hnuah kar hmasa khan US President Donald Trump-a chuan Iran hi inremna siam dan tur ‘an thlang kual’ niin a sawi.
Tun kar tawpah hian thawh dang atan an inbe leh dawn a. Hetih lai hian Iran aiawha dawrtu ber chuan uranium siam chhuah titawp hmak tura US-in a phutna chu an hnawl thu a sawi tawh a. Uranium hi reactor fuel atan an hmang thin a, nuclear ralthuam siamna pawh a ni tel.
Kum 2015-a Iran leh khawvel ram lianten nuclear chungchanga inremna an neih atangin Trump-a hian a president hmasak hun lai khan US a chhuahpui a. Tun tum indawrnaah hian Iran-in inremna a siampui lo a nih chuan US leh Israeli sipaite an che chhuak dawn tiin a vau lawk.
Iran hian nuclear a sawngbawl dan chu a muanawm em em a, thil dang siam emaw, nuclear ralthuam neih tum emawin hma a la lo niin a sawi ve thung.
Hetih mek lai hian US-in nuclear inremna hnuaia thil kalpui dan tur a tih erawh a bawhchhia a, hei vang hian kum sarih kal ta atang khan na taka hrek mek a ni a. Uranium thahnem tak a chhek a, hengte hi bomb tam tak siam theihna daih a ni.
Khamenei-a hian US nena an inbiakna chungchang hi kum khat kal taa helicopter chesuala thi president, Ebrahim Raisi-a puala hun hmanah a sawi chhuak.
A puithiampui, Raisi-a chu president a nih chhunga US nena inbiak a duh lohnaah a fak nghe nghe.
Khamenei-a hian Raisi-a hmaa mi, Hassan Rouhani-a khan US dawrin a tum a hlawhtling lo niin a sawi a, a thlak lehtu, Masoud Pezeshkian-a hnuaia inbiakna pawhin rah tha a chhuah a rin loh thu a sawi bawk.
Kum 2015-a Iran nena inremna kha US President Barack Obama-a hun laia siam niin UK, France, China, Russia leh Germany pawh an tel a. Tehran-in nuclear a sawngbawl dan chu International Atomic Energy Agency (IAEA)-in an enpui zel tura tiin thil tha lo a tih chuan hrek turin an inrem.
Iran hi uranium a tihthianghlim dawn pawhin 3.67% china tihthianghlim chauh phalsak a ni a, hei hi nuclear power plant-ah tuialhthei atana hman theih chin a ni.
February khan IAEA chuan Iran hian uranium kg 275 dawn a kawl a, hengte hi 60%-a thianghlim a nih thu sawiin ralthuam atana hman theih thuak a tling niin a sawi a. 90%-a a thianghlim a nih chuan nuclear bomb paruk siam theihna daih a ni.