Gaza-ah puihna lut mah se sem darh a la ni lo – UN

Gaza-ah puihna lut mah se sem darh a la ni lo – UN
UN chuan Gaza-a luhna chawlhkar 11 zet dan a nih hnua puihna phur lorry-te lut leh tawh mah se engmah sem chhuah a la awm lo tih a sawi.
Israeli thuneitute chuan Thawhlehni khan Gaza-ah hian chhangphut, naute chaw, damdawi hmanrua leh damdawi te phur tel truck 93 a lut tih an puang a; mahse, UN chua hengte hian Palestinian lama Kerem Shalom crossing kân tawh mah se engmah sem a la ni rih lo tih a sawi.
An thupuangtu, Stephane Dujarric chuan team-in Israel-in a luhtir phal hun ‘darkar tam tak’ an nghal a; mahse, ‘vanduaithlak takin engmah hian kan warehouse an la thleng lo’ tih a sawi.
Israel hian Pathianni khan ram hrang hrangten tam a tla mai dawn tia an nawr hnuah Gaza-a ‘ei tur mamawh tawk’ luhtir a phal a, na takin Israel hi nawr chhunzawm zel a la ni bawk.
UN chuan Gaza-a chengte tamna nasa tak bei let turin ni tin truck 600 tal a luh a ngai tih an sawi.
A hma khan UN-a humanitarian chief Tom Fletcher chuan Israel hian puihna a luhtir thuai loh chuan Gaza-a naute sang tel thi mai thei an nih thu a lo sawi tawh.
Integrated Food Security Phase Classification (IPC)-in report a siamah chuan April, 2025 leh March, 2026 inkarah naupang kum ruk atanga thla 59 inkara 14,100 chuan kham ei tur neih loh kaihhnawih natna an nei dawn niin a chhut lawk.
Kar hmasa khan Hamas hnuaia health ministry chuan chawlhkar 11 liam ta chhungin ei tur hmuh loh vangin naupang 57 an thi niin a lo sawi tawh bawk.
US Secretary of State Marco Rubio chuan Thawhlehni khan Israel-in Gaza-a puihna thil thenkhat luhtir a phal ta chu lawmawm a tih thu a sawi a, Senate Foreign Relations Committee hmaah, “Puihna hi a dan pangngaia a luh leh theih ngei pawh kan beisei,” a ti.
Tar lan tawh thin angin Israel hian Gaza-a Hamas-ten October 7, 2023-a an ram beia mi 1,200 chuang an thah leh hren tura mi 251 an hruai phuba lak nan a bei let.
Hemi hnuah hian Gaza-ah hian mi 53,475 thi an awm tawh a, heng zinga 3,340 chu inkahhai puan a tawp hnua March thla atanga thapui an thawh thar leh hnua thi an ni.