Iraq-ah Kristian 100 chuangin nunna chan

Northern Iraq-a Kristian inneihnaah kangmei chhuak avangin mi 100 chuangin nunna chanin mi 150 chuangin hliam an tuar a, nunna chan hi la pung thei tura ngaih a la ni bawk.
Kangmei hi Iraq-a Ninevah province-a Hamdaniya area-a chhuak a nih thu thuneitute chuan an sawi a. helai hmun hi Kristian tamna niin Mosul city pawn lawka awm niin capital Baghdad atanga 335 km a hlaa awm a ni.
Kangmei chhuak hi a nasa hle a, dam chhuakte pawh oxygen leh bandage nena intuam lekluhin ruang thenkhat chu hriatfiah harsa khawpa kangchhia a ni bawk a.
Health Ministry thupuangtu Saif al-Badr chuan, “Vanduaite chhawmdawl hna theihtawpa kalpui nghal a ni” tiin al-Badr chuan a sawi bawk.
Prime Minister Mohammed Shia al-Sudan chuan kangmei chhuah chhan chhui chiang tura a tih nghal thu sawiin chhawmdawlna awm theite kalpui nghal a ni ang a ti bawk.
Najim al-Jubouri, provincial governor of Nineveh chuan hliam tuar thenkhatte chu regional hospital-ah sawn an nih thu a sawi a. Tun dinhmunah chuan thi leh hliam zat chiah hriat theih a la ni lo a ti bawk.
Eng vanga kangmei chhuak nge a ni tih hriat theih a la ni lo va, Kurdish television news channel Rudaw chuan a hmuna fireworks tih atanga indep kai ni theia ngaih a nih thu a puang thung.
Civil defence official-te chuan Iraqi News Agency hnenah wedding hall pawn lam chu thil kang mai thei hmanga chei a ni tiin a sawi bawk a.
“Kangmei chhuak avang hian hall hmun thenkhat chu chimin, hun reilote chhungin a chim mai a ni” tiin civil defence-te chuan an sawi.
Tun kangmei hi Iraq-a Kristian te tan chuan a pawi hle a, an tlem tial tial a, tun hnai kum sawm hnih vel chhungin al-Qaeda leh Islamic State militant group ten an chungah hleilenna nasa takin an kalpui tawh bawk a ni.
Iraq-ah hian Kristian 150,000 vel chauh an awm tawh a, kum 2003 vel kha chuan 1.5 million vel an awm anga chhut niin Iraq population hi 40 million vel a ni thung.