IS-a telten DR Congo-a inkhawm an beihnaah tam tak thi

IS-a telten DR Congo-a inkhawm an beihnaah tam tak thi
Islamic State (IS) firfiak pawla telten Democratic Republic of Congo hmarchhaka mi an beihnaah mi eng emaw zat an thi tih tual chhung thuneituten an sawi.
Allied Democratic Forces (ADF) fighter-ten Komanda khua an beihnaa thi zinga 20 chuang chu zan lama inkhawma telte niin an sawi.
Biak in bul hnaia dawr leh sumdawnna hmunte an rawk a, an hal bawk.
ADF hi kum 1990 chho vela Uganda atanga indin niin sorkarin Muslim-te a tiduhdah niin an sawi thin a; mahse, tunah chuan DR Congo ramri piah lamah inbun nghet tawh zawkin sakhaw hrang hrang zuitu an bei nasa a, Uganda-ah pawh pawi an khawih fo.
Mozambique pawh huama Islamic State hnuaia Central African Province-ah a phusa pawl an ni.
Komanda-a civil society coordinator Dieudonne Duranthabo chuan ruang dang pawh an hmuh belh zel an inring tih Associated Press a hrilh.
“Biak in chhung leh pawn lamah mi 21 chuang kah hlum an ni a, ruang pathum kang chhe tawh tak leh in kang a awm bawk a. Zawn hna thawh zel a la ni,” tiin Pathianni tlai khan a sawi.
Father Aime Lokana Dhego-a chuan AFP news agency hnenah, “Eucharistic Crusade-a kan member 31 vel an thi a, mi dang paruk na takin an inhliam bawk a. Naupang deuhte ruk bo an ni bawk a, an chanchin kan la hre rih lo,” a ti.
Khaw chhung hmun dangah ruang dang pasarih an chhar bawk.
UN-in a puih Radio Okapi website chuan thi zat hi 43 niin a tar lang ve bawk.
Sipai thupuangtu erawh chuan thi hi 10 finfiah tawh a ni tih a sawi thung.
Kum 2021 khan DR Congo hian Ugandan sipaite chu an ram chhunga ADF bei turin a sawm a, hma la dun mah se beihna erawh an la thlen reng.
Komanda hi DR Congo-a ram leilung hausa lai, Ituri province-a awm niin ralthuam keng pawl hrang hrangin a hlawkna beiseiin an inchuh nasa hle.