IS firfiak chhu chimit tur zingah Syria inpe

On Nov 12, 2025 8 0

IS firfiak chhu chimit tur zingah Syria inpe
Syria chuan ram tangrualte zawmin Islamic State pawl hneh tuma beihnaah a tel ve dawn ta tih US-a Donald Trump-a sorkar hotuin a sawi.
President Trump-a leh Syrian President Ahmed al-Sharaa te White House-a an inkawm hnu lawkah hei hi puan niin Syrian hruaitu hi an ram a tlawh hmasak ber a ni bawk.
Fox News-a Special Report-a an kawmnaah al-Sharaa chuan Washington a tlawh chu an ramin US a thawhpuina tura ‘bung thar’ a nih thu a sawi.
Trump-a hian tun hnai lawkah pawh firfiaka a chhak, al-Sharaa a tlawp thu hi a sawi a, tunah tak erawh US sorkarin firfiak nihna hi an hlihsak tawh.
Syria hi IS leh Middle East-a ram dang hel pawl lut thinte chhut chimih tuma ram tangruala tel 90-na a ni.
Hruaitu pahnihte hi an inkawm zawh hnu lawkah sorkar hotu lian pakhat chuan US Treasury Department bakah state leh commerce department-ten eibara Syria an hrekna an hlih zui dan tur an tifel dawn tih a sawi bawk.
Oval Office-a an inkawm zawhah Trump-a chuan ‘Syria hi ram hlawhtling a nih kan duh’ a ti a. “He hruaitu hian a tih theih pawh ka ring,” a ti.
Syria leh US inkara inzawmna hi kum 2012 atang khan a tawp a, tunah chuan US hian Syria hi Washington-a an embassy pawh hawn a phalsak leh tawh.
Tun hi hruaitu pahnihte an inhmuh vawi thumna niin May khan Gulf Cooperation Council-ah inbiain September thla khan UN General Assembly-ah zanriah an kil dun bawk.
Al-Sharaa hi tun hmaa jihadist thin a ni a. Hun rei pawh la liam lova khan Septembe 11, 2001-a US beitu, al-Qaeda firfiak pawl nena inzawma an hruaitu a ni.
Nikum thleng khan Hayat Tahrir al-Sham hel pawl hruaitu niin US-in firfiak pawlah a dah a, a luman pawh $ maktaduai 10 a chhia a, thla li kal ta khan khan hei hi hlih chauh a ni.
Treasury Department phei chuan al-Sharaa hi ‘specially designated global terrorist list’ a siam atangin kar hmasa khan a paih chauh.
A pawlin nikum kum tawpa thuneihna an chan hnuah Syrian president a ni a, a hmaa tharuma a chetna dah thain Syria tun din tuma hma a lak hnuah ram dangte nen inkawmngeih dan a dap mek zel a ni.