Isarel-in inkahhai duh lo bur
Israel forces te chuan northern Gaza Strip thuk zawkin tank nen an luhchilh mek a, he mi hmang hian chhim lam luhna leh chhuahnate chu an dangchat mek bawk.
Tank pakhat chu Salah al-Din road ah hmuh niin hei hi Gaza City pan tur nia ngaih a ni.
Israel chuan Hamas tena an mankhawm mi 230 te chhuah zalen chu ngaih pawimawh berah a neih niin an zinga pakhat Pte ori Megidish chu chhuah zalenin a awm a.
Heng Israel mite hi naupang leh kum upate pawh telin anni bakah sipaite pawh an tel a. Hamas tena 7 October a Israel an beih thuta an man te niin kha vang khan Israeli 1,400 chuangin nunna an chan phah tawh a ni.
Tunkar tir lam atang khan Israel chuan Netanyahu-a’n indona ‘second stage’ a tih chu tanin lei lam sipaite chuan Gaza ram chhung thuk zawkin an luhchilh a, nasa zawkin bomb thlakin chet an la bawk.
Gaza-a Hamas te enkawl health ministry chuan Israel chetlakna avangin nunna chan 8,300 chuangin nunna an chan tawh tia sawiin hei bakah hian mihring maktaduai 2.2 te chuan ei leh bar mai bakah tui thianghlim leh damdawi te an tlachham mek tawh tiin a sawi bawk.
Netanyahu chuan Gaza a inkahhaina siam tumna chu hnawlin a sipaite chetlak mekna tihkhaihlak chu ‘Hamas te laka inpekna leh firfiakna laka inpek tluk a ni ang’ tiin a sawi.
“Vawiin hian civilisation leh barbarism kan inbei mek a ni” tiin Thawhtanni khan a lo sawi tawh a. “Israel chuan barbarism hneha a awm hma chuan a bei reng dawn a ni. Khawvel hmun tina civilised ram te chuan min thlawp kan beisei” tiin a sawi bawk.
Aid agencies te chuan Gaza a tanpuina thawn luh a nih ngei theih nan ngenna an siam reng thung.
Hetih lai hian Gaza hmar lama mipuite chu Israel-in inla chhuak tura a ngen chungin mi 600,000 vel an la awm tho tia sawi a ni a.
UN chuan northern Gaza-a hospital 10 vel te chu rauhsan tura hrilh an nih thu sawiin hei vang hian damlo 117,000 vel te chu dinhmun derthawngah an awm mek tiin an sawi bawk.
Hei bakah hian Gaza City southern Tal al-Hawa distirct a Al-Quds Hospital chhungah damlo 400 vel zet leh chenna hmun nei lo 14,000 vel an awm khawm mek tia sawi a ni bawk a. Israel chuan helai bial bawr vel hi nasa zawkin a bei mek a ni.
US-in inkahhai rawtna hnawl
US chuan Israel leh palestinian group Hamas te inkara inkahhaina awmtir tura nawrna chu hnawlin ‘tunah chuan a rem lo’ tiin a sawi.
US National Security thupuangtu John Kirby chuan Gaza a tanpuina thawn luh a nih theih nan erawh ruahmanna siam ni se a ti thung.
Israel thung chuan Hamas te nuaichimiha an awm hma chuan an tawp dawn lo tiin a sawi bawk a. Chutih laiin Kirby chuan tanpuina tam zawkin Gaza chu Egypt atanga a luh theih a beisei thu a sawi.