ISI nena inzawm ralthuam leh ruihhlo tawlhtu man
ISI nena inzawm ralthuam leh ruihhlo tawlhtu man
Punjab-a Amritsar Rural Police chuan Pathianni khan Pakistan-a an hnu chhui pawl, Inter-Services Intelligence (ISI)-in an puih thin nia an sawi, ramri kâna ralthuam leh ruihhlo tawlhtu inzawmna hai chhuakin mi panga an man tih thu an chhuah.
Police hian assault rifle, AK Rifle mu 90, 9 mm cartridge 10, leh ruihhlo an hralhna atanga an hmuh Rs. nuai 7.50, car leh mobile phone pathum an man tel.
Punjab DGP Gaurav Yadav-a chuan, “Amritsar Rural Police chuan sorkar laipui hnuaia thawktute nena tanghovin ramri pêla ruihhlo leh ralthuam tawlhna thil man chhuah a ni a, heng mite hi Pakistan ISI-in an thlawp a ni,” tiin X-ah a tar lang.
“He thilah hian rinhlelh mi panga man tel an ni bawk,” a ti.
Police chuan an mi mante hi Joban tia koh, Jobanjit Singh, Rangharh; Gora Singh, Rangharh; Shalu tia koh, Shenshan, Rasulpur Kallar, Amritsar; Ganna tia koh, Sunny Singh, Rasulpur Kallar, Amritsar leh Motu tia koh, Jaspreet Singh, Mugal Mangri, Rupnagar te an man tel tih an sawi.
An thil mansakte hi gangster hriat hlawh tak, Jaggu Bhagwanpuria-a hnena an pek tur niin an sawi bawk.
“Chhui tawhna chinah chuan heng mi mante hi Pakistan-a ISI mite nen inzawmna an nei ngei nia ngaih a ni a. An thil mansak takte hi Nav Pandori-a gangster hriat hlawh, Jaggu Bhagwanpuria hnenah an hlan tur a ni a, ramri pelin pawi khawihna thil ni ngeia hriat a ni,” tiin DGP Yadav chuan X-ah hian a tar lang a ni.
Inrinni khan Amritsar Police chuan ruihhlo tawlhtu mi pali leh an thil ken, heroin kg 6.106 an lo man tawh bawk.
An mi man zingah hian Sarabjeet Joban-a chu a bultumtu leh an hotu ber a ni tih finfiah a ni tawh a, Pakistani ruihhlo tawlhtu lian, Rana-a nen pawha inzawma thawk dun thin a ni tih finfiah a ni.
“Ruihhlo tawlhtu mante zingah hian Sarabjeet Joban-a hi an bulpui ber a ni a. An heroin mansakte hi Indian lama hmun hrang hranga an theh darh kual tur niin a hma hun rei tak atang tawhin hetiang hi an lo ti thin tawh a ni,” tiin Commissioner Gurpreet Singh Bhullar chuan thuthar lakhawmtute hnenah a sawi.