ISL club 12 te dinhmun leh an hmabak

India rama football club te inelna ngaihhlut hlawh ber Indian Super League 2024-25 khelh mek a ni a, a hmawrbawk a hnai chho viau tawh. ISL season kal mekah khelh hmabak pali la awm chunga club hrang hrangte dinhmun kan tarlang ang.
1 Mohun Bagan Super Giant
ISL 2023-24-ah League champion Kolkata club lian Mohun Bagan Super Giant hi season kal mekah an chetha leh viau a, khelh 20 atanga point 46 hmuin goal difference-ah +25 a ni mek bawk. Anni hi chuan play-off an khelh phak dawn chiang tawh a. Khelh li khelh hmabak la neiin; Kerala Blasters (A), Odisha FC (H), Mumbai City (A), FC Goa (H) te an hmachhawn zui leh dawn. Mohun Bagan hian League Shield kawl chhunzawm thei turin point 12 hmuh theihna atangin point ruk chauh an mamawh tawh a, League champion ni zawn turin an dinhmun a tha hle.
2 FC Goa
Table-ah pahnihnaa awm mek FC Goa hian hmahruaitu Mohun Bagan aiin vawi khatin an khel tlem zawk a, hmahruaitu nen an inthlauhna hi point 10 a ni mek. Anni hian vawi 19 an khel tawh a, point 36 hmu mekin goal diference-ah +11 a ni mek bawk. FC Goa hian khelh hmabak vawi nga an la nei a. An khingpui turte hi an hrawl riau thung. ISL champion Mumbai City FC an hmachhawn a ngaih bakah an chunga awm Mohun Bagan a hmachhawn a ngai bawk. Mohun Bagan champion nawn lehna kawng dal theitu ni bawk mah se a hmabak a hautak viau dawn thung. An hmachhawn zui leh turte chu: Mumbai City (A), Kerala Blasters (H), Punjab FC (A), Mohammedan SC (H) leh Mohun Bagan (A) te an ni.
3 Jamshedpur FC
Anni hian vawi 19 khel tawhin point 34 an hmu mek a, pahnihnaa awm mek FC Goa nen an inthlau lo hle. Pathumnaah awm mek mah se anni hian goal an chhuah thei viau thung a, goal diference-ah pawh -2 a ni teh tlat. Khelh nga khelh hmabak an la nei a, team lian Mohun Bagan Super Giant, Mumbai City FC leh Bengaludu FC te an hmachhawn tawh dawn lova, playoff khel turin tlina hun tha tak an nei. Jamshedpur FC hmachhawn leh turte chu NorthEast United (H), Mohammedan SC (A), Kerala Blasters (A), Odisha FC (H) leh Chennaiyin FC (A) te an ni.
4 Bengaluru FC
Mizo si nghak Lalthuammawia khelhna Bengaluru FC hian vawi 20 an khel tawh a, point 31 hmuin goal diference-a an dinhmun chu +8 a ni. Hmahruaitu Mohun Bagan nen vawi 20 ve ve an khel tawh a, an inthlauhna hi point 15 zet a ni tawh a, League champion an ni thei lo chiang tawh. Team rukin play-off an khel phak dawn a, playoff khelh phak ngei tumin tan an khawh ang. Bengaluru FC hmachhawn leh turte chu; NorthEast United (A), Chennaiyin FC (H), East Bengal (A) leh Mumbai City FC (H) te an ni.
5 Mumbai City FC
Champion lai Mumbai City FC hian beisei angin bul an tan tha tawk lova, khelh nga khelh hmabak la nei bawk mah se League champion an ni dawn lo tih a chiang der tawh. An player Lallianzuala Chhangte pawhin beisei a phak lo reng a, season tawp dawn hnaih lamah LZ Chhangte hi insiamthain an khelh hnuhnung vawi thumah goal hnih a thun nghe nghe. Apuia chhuah vangin LZ Chhangte hi a langsar tawk tawh lo nia ngaih a ni. Mubai City FC hi an hmabak a la hautak hle a, vawi nga an khelh leh turah an chunga awm team pathum ngawt an hmachhawn a ngai dawn a. Season lian taah League shield chhuhsaktu Mohun Bagan an la hmachhawn dawn bakah FC Goa leh Bengaluru FC te an hmachhawn a ngai dawn bawk. An khingpui ni leh tur dangte chu Hyderabad FC (A) leh Kerala Blasters (A) te an ni.
6 North East United FC
ISL a hmarchhak team awmchhun North East United FC hian vawi 20 khel tawhin point 29 an hmu mek a, goal diference-ah +10 a ni mek. Khelh hmabak pali an la nei a, an hnuai chiaha awm Odisha FC nen point thum chauhin an inthlau mek a, an dinhmun a him lo hle. NEUFC hian Jamshedpur FC (A), Bengaluru FC (H), Chennaiyin FC (A) leh East Bengal (H) te an hmachhawn zui leh ang.
7 Odisha FC
Pasarihnaa awm mek, parukna nih phak ngei tuma tan khawh Odisha FC hian vawi 20 an khel tawh a, point 26 an hmu mek. Goal difenrence-ah +5 a ni mek bawk. Khelh li chiah khelh hmabak an nei tawh a, an hnuai chiaha awm Kerala Blasters aia khel tam zawk chungin point hnih chiahin an inthlau a, an dinhmun a tha lem lo viau. Odisha FC hmachhawn leh turte chu: Hyderabad FC (H), Mohun Bagan (A), Mohammedan SC (H) leh Jamshedpur FC (A) te an ni.
8 Kerala Blasters
Anni hian vawi 19 khel tawhin point 24 an hmu a, goal diference-ah 0 an ni. Khelh nga khelh hmabak an la neih vangin play-off khelh phak beiseina an la nei thei a, an khingpui turte erawh an nep dawn lo viau thung. Kerala Blasters hian khelh hmabak panga an la neihah hmahruaitu Mohun Bagan (H), pahnihna FC Goa (A), Pathumnaa awm mek Jamshedpur FC (H) bakah champion lai Mumbai City FC (H) an hmachhawn a ngai a. Heng club lian pali bikah hian Hyderabad FC (A) an hmachhawn bawk ang.
9. Punjab FC
Anni hian vawi 19 an khel tawh a, point 24 hmu mekin an chung chiaha awm Kerala Blasters nen an point hmuh zat a intluk mek a, goal diference-ah -2 a ni thung. An chunga awm Kerala Blasters angin khingpui hautak lutuk hmachhawn tur an nei tawh lo thung a. An khelh hnuhnung pangaah an chetha a nih chuan invawrh dawrh theihna hun remchang an la nei. An khingpui leh turte chu: Chennaiyin FC (A), East Bengal (H), FC Goa (H), Hyderabad FC (A) leh Mohammedan SC (A) te an ni.
10 Chennaiyin FC
Jeje Lalpekhlua club hlui Chennaiying FC hi season kal mekah an khel tha lo hle. Vawi 20 khel tawhin point 21 chauh an hmu a, goal difenrence-ah -5 lai a ni bawk. Khelh hmabak pali an la neihah khingpui hautak lutuk tur an awm hran lo va, insiamthat theihna hun a la awm. An khelh dan phung enin invawrh dawrh tura beisei ngam erawh an ni lo. An khingpui leh turte chu: Punjab FC (H), Bengaluru FC (A), NorthEast United (H) leh Jamshedpur FC (H) te an ni.
11. East Bengal
Kolkata-a an elpui lian Mohun Bagan in hma an hruai a, League champion ni nawn leh ngei tura ngaih an nih laiin East Bengal erawh table hnuai ber dawttu-ah an awm mek a, tlak hniam pumpelh tumin tan an khawh viau a ngai dawn. East Bengal hian vawi 19 khel tawhin point 18 an hmu mek a, goal diference-ah -8 a ni mek bawk. An hnuai chiaha awm nen point hnih chiahin an inthlau a, tlak hniam hlauhawmah an la awm. An khingpui leh turte chu: Mohammedan SC (A), Punjab FC (A), Hyderabad FC (H), Bengaluru FC (H) leh NorthEast United (A) te an ni.
12. Hyderabad FC
Anni hian vawi 19 khel tawhin point 16 an hmu mekah goal diference-ah -19 ngawt a ni mek bawk. Table hnuai berah an awm mek a, an hmachhaw leh tur Odisha FC (A), Mumbai City FC (H), East Bengal (A), Punjab FC (H) leh Kerala Blasters (H) te laka chetthat an mamawh hle dawn. An chung chiaha awm East Bengal nen an inhmachhawn tur hi an tan inkhel pawimawh tak a ni ngei ang.