Gaza-a Hamas-tena an hren mitangte him dam taka chhuah zalen an nih loh avanga Israel-a lungawilohna lantir chuan nunphung a tikhaihlak nasa hle a, international airport thlenga tibuaiin chu chuan Israel-a politics thila inthenhranna nasatzia a pholang anga ngaih a ni.
Israeli sing tam tak te chuan Gaza-a mitang paruk thia hmuh an nih duhlohna lantirna neiin kawtthlerah an pungkhawm a. Mitang chhungte chuan Prime Minister Benjamin Netanyahu chu nasa taka demin thla 11 chhung zet indona kalpui tawhah mitangte him dama la chhanchhuak thei lovah an puh a ni.
Chutih rualin mi tam tak te chuan Netanyahu an Hamas te laka indona a kalpui chu tihmakmawh tiin an thlawp tlat thung a. A tawpah chuan Hamas te chuan Israel demand chu an tihlawhtling lo thei lo tia sawiin mitang la damte chhanchhuah bakah Hamas te chu nakin zela che thei lova siamna tur an ti ve thung.
-- Advertisement --
General strike hmasa ber
Israel a trade union lian ber Histadrut te chuan Thawhtanni khan general strike neiin indona kalpui hnua a tumkhatna a ni a. Israel economy a sector lian ber ber nghawngin banking, health care leh airport te pawh a tibuai hle a ni.
Israel-a international airport lian ber Ben-Gurion airport-ah thlawhna lut leh chhuakah khaihlakna awmin thlawhna thlawk chhuak tur leh lut tur tihkhawtlai a ni a, khualzinte thui tak tak an intlar bawk.
Lungawilohna lantirna avang hian mall lian leh sorkar office hrang hrang te pawh kharin a awm a. Israel a mipui chen tamna central area a municiaplity ah te chuan lungawilohna lantir niin chu chuan school-te pawh a nghawng tel bawk.
Mahse lungawilohna lantirnaah hian municipality hrang hrang Jerusalem te ang chu an inhnamhnawih ve lo thung a, Israel sorkar chuan mipuite chu lungawilohna lantirnaah tel lo tura ngenin politics thila chetlakna a ni, an ti bawk.
Netanyahu nawrna
Pathianni kalta khan Israel khawpui Tel Aviv-ah lungawilohna lian ber lantir niin mi 5,00,000 chuang telin Netanyahu chu Gaza a Israeli mitang 100 bawr vel te chhuah zalen an nih theih nana hma la turin an ngen a. Israeli tam tak te chuan mitang chhuah zalen tura nawrna chu an thlawp laiin tam takte chuan mitang te zalenna aiin Hamas te nuaichimih chu pawimawh zawkah an ngai tho thung.
Netanyahu chuan a hma pawhin Hamas-te lakah hnehna kimchang tiamin mitangte chhuah zalen an nih theihlohnaah Hamas te chu a dem thung bawk a.
Hamas-te chuan Israeli sipai tena an tanna tunnel an luhchhuah dawn ruaiah Hamas te chuan mitang parukte chu an tihlum nghal a, an zinga pathumte chu Israeli-American te niin July thlaa mitang inthleng tawn chhuah tura an chhawpchhuah hmasak zawk tawh te an ni a. Israeli Health Ministry chuan heng mitang te hi hnai takah kahhlum an ni tiin a sawi.
Netanyahu chuan Hamas te chu dem zui nghalin ‘mitang te kahhlum duhtute hian inremna siam an duh lo’ a ti hmak thung.
Hamas ten Israel leh US dem
Hamas te chuan Israel leh United States te chu demin inbiakna neih tikhawtlaia demand hrang siam belh zelah a puh a, chung zingah chuan Israel-in Gaza-a strategic corridor pahnih thunun a ngiatna te pawh a sawi lang. Hamas-te chuan indona tihtawp a nih chuan mitangte chhuah zalen a intiam ve thung a, Israeli forces te chu Gaza atanga inhnuhdawh vek leh Palestinian high-profile prisoner Israel lung ina tang mek te chhuah zalen a ngiat thung.
Nikum October 7-a Hamas tena mitang an hruai khan mi 250 vel nia ngaih niin heng zingah hian 100 vel chu an la kawl anga ngaih a ni a, mi 35 vel te chu thi tawh anga ngaih an ni bawk. Nikum November thla khan inremna lailawk siam laiin mi 100 chhuah zalen an lo ni tawh bawk.