Rahul-an sorkar ngawih chuh tlatah puh

Congress leader Rahul Gandhi chuan BJP sorkar chu minority te a bik takin Muslim tena beihna nasa tak an tawh chamchi-ah ‘ngawi renga thlirtu’ mai a ni reng tia sawiin heng minority te laka chet latu ‘anarchist elements’ te lakah hian hremna na tak lekkawh tur a ni tiin a sawi.
Tun hnai lawkah BJP rorelna Haryana leh Maharashtra-ah mob violence tum hnih thlengin, August 27 khan West Bengal atanga Muslim migrant chu Haryana a Charkhi Dadri-ah bawngsa ei tia puhin chilhlum a ni a.
Maharashtra-ah pawh kum upa tawh tak pakhat chu Kalyan a pan laiin bawngsa a keng tia puh niin sawisak vak a ni bawk.
Heng mob violence kaihhnawih video thehdarh lar nasat tak te screenshot chu tilangin Gandhi chuan huatna te political weapon a hmanga dinhmun sang chelh phah nana hmang tute chuan he ramah hian ‘rule of fear’ an tuh mek a ni a ti bawk a.
“Huatna thehdarh tute chuan mob hmang tangkaiin tharum thawhna an thehdarh mek a, chu chu rule of law chan a ni. Heng misual te hian BJP sorkar lakah free hand hmuin huaisar takin chet an lak ngam phah a ni” tiin Congress chief chuan a sawi bawk.
Minority te a bik takin Muslim tena beihna an tawng chamchi chungin sorkar machinery te chu ‘ngawi renga thlirtu’ an la ni zui zel a ni tiin a sawi bawk a.
“India rama communal unity beihna chu Constitution beihna a ni a, kan ngaizam mai mai tur a ni lo. BJP te hian huatna eng ang pawhin thehdarh mah se, India lungrual a awm theih nan inbeihnaah chakna kan chang tho ang” tiin Congress leader chuan a sawi bawk.